KHAWTHLIR

Mei zu mi 12 man

Aizawl District Anti Tobacco Squad chuan nimin khan Treasury Square huam chhunga sorkar pisa hrang hrangah dan loa mei zu an awm leh awm loh an endik a, dan bawhchhia mi 12 manin, pawisa an chawitir.

Zirlai ṭanpuina hlân

Siaha District Poor Students Trust Society chuan nimin khan Siaha DC pisaah Siaha district-a zirlai harsa zual, zirna lama ṭanpui tlaka ngaihte hnena ṭanpuina an hlan. Ṭanpuina hlante hi zirlai panga an ni a, Rs 39,000 ṭheuh pek an ni.

Kawng khâr dawn

Venghnuai Presbyterian biak-in aṭanga Venghnuai khelmual inkar kawng siamṭhat hna thawhah kawng a tlo zawk theih nan vawiin chawhma dar 10 aṭanga November 30, 2024 thleng kawng khâr a ni dawn. Hemi chungchangah hian Traffic SP Stephen Lalrinawma chuan thuchhuah a siam a ni.

Mamitah thlai lei dan tur sawiho

Mamit District Agricultural Marketing Committee chuan nimin khan an chairman Jacob Lalawmpuia, bawrhsap kaihhruaiin aieng, sawhthing, hmarcha leh hmunphiah lei dan tur an sawiho. Ṭhutkhawmah hian Mamit district-a society bakah, primary leh secondary collection centre awmna hmun turte thlan a ni.

ATM booth hawng

North Vanlaiphaia Apex Bank ATM booth thar chu nimin khan Mizoram Cooperative Apex Bank director Rosiamliana Ralte-in a hawng a; Apex Bank ATM booth 38-na a ni.

END-in heroin man

Serchhipa Excise & Narcotics department duty-te chuan November 11, Thawhṭanni zan zanlai pelh hnu, zing lam dar 1:40 khan Serchhip Chanmari Vengtharah H Lalhmangaiha (27) s/o Zohmingthanga, Serchhip Chanmari Vengthar hnen aṭangin heroin (no. 4) gram 56.59 an man.

MPS siam rem

Mizoram sorkara secretary C Lalzahngoa chu IPS-ah a kai tak avangin Zosangliana, MPS chu Mizoram sorkara secretary-ah a kai sang a, Transport department a enkawl ang. Aizawl district superintendent of police atan Rex Zarzoliana Vanchhawng, MPS ruat a ni bawk.

Hmeichhe himna chungchang zirho

Serchhip District Legal Services Authority leh District Hub for Empowerment of Women chuan nimin khan DC pisa hall-ah hnathawhna hmuna hleilenna laka hmeichhiate venhim theihna tur zirhona, 'Training on Prevention of Women from Sexual Harassment, 2013 at Workplace' an buatsaihl. Magistrate first class Josangzeli Tlau-in hnathawhnaa hleilenna laka hmeichhiate venhimna, an dikna chanvo leh dan bawhchhia hremnate a sawifiah a ni.

New Pension Scheme zirho a ni

Accounts & Treasuries Chief Controller of Accounts buatsaihin nimin khan Lunglei Convention Centre-ah Mizoram chhim lama district treasury pathum - Lunglei, Hnahthial leh Chawngte hnuaia awm department hrang hrang DDO-te pualin New Pension Scheme chungchang inhrilhfiahna leh zirhona hun hman a ni. He hunah hian mithiamte'n thil pawimawhte an sawifiah a; zawhna leh chhanna hun hman a ni bawk.