District-a ZPM-te'n Duhoma bàn pawi ti

District hrang hranga Zoram Peoples' Movement (ZPM) party-te chuan thuchhuah siamin, Assembly Speaker-in ZPM Lagislature Party leader Lalduhoma MLA aṭanga a bàn chu pawi an tih thu leh hriatthiam har an tih thu an tarlang.

Serchhip ZPM-te chuan, Assembly Speaker thil tih dan chu Serchhip bial mipuiin thil mak taka an ngaih thu a tarlang a, "Serchhip bial mipui hi min phatsan a hnêkin opposition MLA ni chungin a bial tan a theihna zawngah hma a la a, kut hnathawktute'n mamawh an thlen apiang chak takin a theihna chinah hma a laksak nghal zel ṭhin. Kum hnih lek MLA a nih chhungin fund a hmang ṭha hle a, Serchhip khaw chhungah ringawt hian public asset ṭha tak tak 30 dáwn min siamsak thei a ni," an ti.

Lalduhoma ban a nih chhan chu rorel lai party MLA rualin hnawk an tih vang liau liau a nih thu sawiin Serchhip ZPM-te chuan, "Hetiang thil an tih duh avang hian Serchhip bial mipuite chu hêktute hian min zah lo hleah kan ngai," an ti a; MLA inbànnain a nghawng zel turah bial mipuite'n Lalduhoma an thlàwp zel tur thu an tarlang.

ZPM Southern Headquarters, Lunglei chuan, Lalduhoma chu kum 2018 MLA inthlana ZPM chief ministerial candidate a nih thu sawiin, "Lalduhoma a ZPM lutuk, ZPM-ah mi a lawm lut tih mai mai vanga MNF MLA-12 te'n Assembly Speaker hnena hêkna an thehluh avanga bàn a ni hi a pawi kan ti a; amah thlang tlingtu Serchhip bial mipui ráwn lo leh an duh dan ngaithla hmasa loa hmalak a ni hi democracy palzûtnaah leh Serchhip bial mipui zah lohnaah kan ngai," an ti.

ZPM Southern Hqrs. office bearer-te'n nimina meeting an neihah Lalduhoma chu law court-a kal kher loin, mipui court (by-election)-a fiahna hmachhawn mai se ṭha an tih thu, Lunglei ZPM chuan an tarlang a; by-election a awm hunah pawh sum leh pái, thâ leh zung séngin theihtawp chhuahpui an inhuam a, an thlâwp tlat tur thu an sawi bawk.

Siaha ZPM chuan, "A thlangtu Serchhip bial mipui a uire sanna pakhat mah awm loa hetiang thutlukna  a awm ta mai hi mak kan tiin hriatthiam har kan ti tak zet a ni," an ti a; Lalduhoma chu an chhuan thu leh MNF MLA 12-te vanga Mizo Kristiante hming sawichhiat leh mualpho taka awm pawi an tih thu an sawi a ni.