Ruang phurh man dilna 91 a lut tawh

Social Welfare & Tribal Affairs minister Lalrinpuii chuan, khaw danga ruang phurh man sorkara dil theihah online kaltlanga dilna thehluh theih a nih theihna turin ruahmanna siam mek a nih thu leh, tun dinhmunah ruang phurh man dilna 91 a luh tawh thu a sawi.

Lalrinpuii hian November 11, 2024-a Aizawl Press Club-a press conference a neihah sorkarin ruang phurh man a tumsakna tur chungchang a sawi a, "September 1, 2024 aṭangin kan hmang ṭan thei tawh. Manual-a lehkha thehluha buaipui a buaithlak avangin Mizoram State E-governance Society nen ṭang kawpin online a thehluh a, awlsam taka bank account kaltlanga ruang phurhna senso pek a nih theih nan hma kan la mek," a ti.

Zawhna chhangin Lalrinpuii chuan, mi 91 aṭangin ruang phurh man tumsak tura dilna a luh tawh thu a sawi a, "Ruang phurh hi kan sorkar tirh aṭangin tihhlawhtlin tumin kan bei nghal a, budget hmasa ber pharh a nih khan ruang phurhna tur sum nuai 500 kan dah nghal a ni," a ti. Ruang phurhna atana hman tur bik lirthei (empanelled vehicle) ruahman turin buaipui mek a nih thu a sawi bawk.