Mizoram Polytechnic kalh rih lo

Lunglei District Court chuan Mizoram Polytechnic, Lunglei kalh tura hriattirna a lo chhuah tawh chu kalpui rih lo tura hriattirna nimin khan a tichhuak.

Thu dawn danin, Mizoram Polytechnic awmna ram neitu Vanlaldawngliana, Theiriat, Lunglei hnenah ram luah man pek a nih loh avangin court-in tun hnai khan November 12, 2024 ral hmaa Mizoram Polytechnic building-te kalhsak turin Lunglei Police Station officer in-charge (OC) a hriattir a; nimin kha hun hnuhnung a ni.

State sorkar hotute chuan Mizoram Polytechnic zirlaite November 13, 2024 aṭanga an exam ṭan dawn avangin harsatna siam rih lo turin court an ngen a; an ngenna angin court chuan thupek a lo chhuah tawh chu kaltlangpui rih lo tura hriattirna nimin khan a tichhuak leh ta a ni.

Court thupek hmasa avang hian Mizoram Polytechnic main building-a bungruate chu multipurpose hall-ah an lo sawn tawh a ni.

Mizoram Polytechnic-ah hian zirlai (regular student) 214 an awm mek a, anni bakah hian back paper nei (repeater) mi eng emaw zat an awm bawk.