Gas sem dan tharah mi 1,53,999 ziak lut

Permanent Advance Rs 568 dawng lo an tam

Eirawngbawlna gas sem dana kalphung thar, Direct Benefit Transfer on LPG (DBTL) hnuaiah kumin April thla tawp thleng khan Mizorama gas consumer 1,53,999 an inziak lut tawh. DBTL zawm veleh hian Indian Oil Corporation (IOC)-in consumer-te bank account-ah Permanent Advance Rs. 568 an thun tur a ni a, mahse pawisa hi consumer zingah dawng lo an tam hlea thu dawn a ni.

Vanglaini palai zawhna chhangin, Food, Civil Supplies and Consumer Affairs deputy director John Ṭanpuia chuan, dan ang chuan consumer-te'n DBTL an zawm veleh IOC-in consumer-te bank account-ah Permanent Advance (P.A) Rs. 568 an thun tur a nih thu a sawi a, "Hei hi DBTL scheme-in a ken tel a ni a, consumer-te'n vawi leh khata market rate-a gas an lei thut vanga a leina tur sum an neih loh palha venna tur a ni," a ti.
John Ṭanpuia chuan, IOC lamin consumer-te bank account-ah P.A Rs. 568 an thun lo nasa tih an hriat avangin, FCSCA directorate-a thawk, PA dawng lote zinga mi 20 vel hmingin IOC-ah complaint thehluh a nih thu leh, IOC aṭangin chhanna an la dawn loh thu a sawi.
DBTL hman a nih hnuah gas man chu market rate-ah a innghat tih sawiin, John Ṭanpuia chuan, "Market rate azirin gas lakna man a danglam thei. Market rate aiin distributor showroom-ah Rs. 18-in a tláwm tur a ni a, showroom aiin distribution point-ah Rs. 7.53-in a to zawk tur a ni," a ti a; Aizawlah chuan tun dinhmunah showroom-a gas man chu Rs. 750 a nih thu a sawi.
Supply deputy director sawi danin, dan ang chuan DBTL hnuaiah hian consumer-te'n gas an lak duh hunah an book tur a ni a, booking chu a hmun (agency)-ah bakah, online leh SMS hmangte pawhin a tih theih. Book hnuah IOC lamin consumer ban account-ah gas subsidy-na sum a thun ang a, chumi hnuah gas chu lak tur a ni.
DBTL hnuaiah hian online hmangin thil tam tak a tih theih tih sawiin, John Ṭanpuia chuan, IOC-ah in register theih a ni a, complaint-te a thehluh theih a, agency-te'n dik taka thil an tih leh tih lohte pawh finfiah theih a ni," a ti a; consumer-te chu Supply department-a innghat ringawt lo a, DBTL-a an dinhmun enfiah ṭhin turin a chah.
John Ṭanpuia chuan, Mizoramah gas connection 2,57,914 a awm laiin, DBTL-a register tawh chu 1,53,999 chiah a la nih thu a tarlang a; DBTL hnuaiah mi pakhatin connection pakhat bak a neih theih loh avangin DBTL-a la register lohte chu gas connection pakhat aia tam neite an nih theih thu a sawi bawk.