Delhi-ah T Sailo pualin hun hmang

May 16, 2015 khan New Delhi-a Cathedral Church of Redemption-ah Brig Ṭhenphunga Sailo hminga thlanṭhutna leh amah hriatrengna inkhawm (memorial service) neih a ni a, amah ngaisangtu mi 500 chuang kalkhawmin, Ṭhenphunga Sailo chanchin an sawiho.

Brig. T Sailo puala inkhawmah hian prime minister hlui Dr Manmohan Singh, deputy chief of army staff ni mek Lt.Gen. Gurmit Singh, Assamese social worker Dr Sanjoy Hazarika, Delhi Archbishop Anil C Custo-te pawh an tel a; chief of army staff Gen. Dalbir Singh, vice president Hamid Ansari leh Rajya Sabha deputy speaker PJ Kurien ten thuchah an thawn a ni.

Inkhawmah hian ‘Tunah a thar hmangaihna eng nuamah’ tih chu Mizo lengkhawm zaiin an sa a, ‘A saw raltiang tlangah' tih chu Delhi Mizo Christian Fellowship-in an ak bakah Delhi Ao Baptist Church zaipawlin ‘Khawngaihna mak, mawi leh duh­awm,’ tih hla an sa bawk.

Brig. T Sailo fapa Lalhmangaiha Sailo chuan a pa chanchin kimchang a sawi a, a pa thlanṭhutna hun siam a ni leh a puala mi 500 chuang an kal chu lawmawm an tih thu a sawi.