KHAWTHLIR

Thisen pe
Lengpuia Isua Krista Kohhran ṭhalaite chuan an kohhran silver jubilee lawm nan nimin khan Aizawl Civil Hospital-ah thisen unit 43 an pe a, a petute mipa 39 leh hmeichhia pali an ni.

Thiin chhar
Pathianni chawhma dar 11 vel khan Bualpuia FCI kudama thawk, labour hotupa Sankar Tanti (50), Bihar lam mi chu thia hmuh a ni a, postmortem a nih hnuah Pathianni vek khan Silchar-a a fapa hnenah phurh thlak a ni. Sankar Tanti hi May 13, 2015 aṭangin a awmna chin hriat a ni lo a, a ruang hmuh a nih lai hian a taksa a chhe tawh hle a ni.

MJA Library pe
MJA Public Library-a dah turin RC Lalrengpuii chuan a lehkhabu buatsaih, 'Rîkrum thila inenkawl dan' tih bu hnih a pe a, a chhungah MJA-in lawmthu a sawi.

Green Mizoram
Sub-Committee on Green Mizoram chu nimin khan an chairman, Environment & Forest minister Lalrinmawia Ralte hoin pisaah an
ṭhukhawm a; kumin Green Mizoram Day chu June 11-ah Hmuifang Tourist Complex-ah hawn ni se, an ti.

Tanpuina hlan
Nepal rama lirnghing tuar Mizote leh an chhehvela mite ṭanpui nana ZONET Cable TV-in thawhlawm a khawna sum lut, Rs. 7,31,039 chu nimin khan Nepal Mizo Welfare hruaitute hnenah hlan a ni. Ṭanpuina thawhtute hi mi 407 an ni.

Museum Day
Nimin kha International Museum Day a ni a, he ni pual hian Mizoram State Museum chu mipui tan man chawi loa tlawh theiha hawn a ni. Tun dinhmunah Mizoram State Museum-ah hian gallery paruk - Zoology, History & Mineral, Anthropology, Ethnology, Textile leh Archaeology-te a awm a; thil (object) 933 phochhuah niin, reserved collection-ah object 2,824 dahṭhat a ni.