High Court-in Expo thubuai a titawp
Aizawl DC Dr Franklin Laltinkhuma'n April thla tawp lama Lammual sira NE International Trade Expo titawp tura thupek a chhuah chu a sût a; hei vang hian High Court pawhin DC thupek khinna chu a titawp.
Aizawl DC chuan May 6, 2015 khan North East Trade Expo tihtawpna tur thupek a chhuah a; a buatsaihtute'n trade licence an neih loh avangin Cr.Pc Section 144 tlawhchhanin a khârsak a ni.
Zawhna chhangin Aizawl DC Dr Franklin Laltinkhuma chuan, Cr.Pc Section 144 tlawhchhana thupek a chhuah chu sumdawnna chungchangah a hman theih loh a, Court-ah thiam loh an chang a nih chuan tun hnuah state páwn aṭangin a duh apiangin trade expo an rawn buatsaih mai ang tih a hlauhawm avangin thupek chu a sût leh ta niin a sawi.
Hetih lai hian, Ranjan B Gohain chuan, DC thupek anga Expo khâr a nih avangin sum tam tak a hloh niin a sawi a; a sum hloh hmuh let nan Court-ah zangnadawmna phûtna petition thehluh leh a tum tih a sawi bawk.