Minor Irrigation department hnathawk mi 94 bàn

Minor Irrigation department-a muster roll (MR)-a thawk mi 94-te chu May 15, 2015 aṭang khan an hna tihtawpsakin bân an ni. Hetihlai hian bân takte hian lungawi lohna an nei lêm loa thu dawn a ni.

Vanglaini thu dawn danin, Minor Irrigation department-a thawk ṭhin ban takte hi mi 94 niin, engineer, clerk, chow­kidar leh peon-te an ni hlawm a; MR-a thawk vek niin, ṭhenkhat chu kum 10 chuang thawk tawhte an ni.

Bàn tâk zinga pakhat chuan, bân an nih chhan chu an hlawh tur sum a awm tawh loh vang niin a sawi a; sum awm lohzia hre chiangtu an nih avangin, lungawi lohna hranpa an nei lo tih sawiin, "Lungawi takin kan báng a ni ber mai," a ti a, sum awm huna rawih leh tura tih an nih thu Vanglaini a hrilh.