Bairabi-Sairang rel kawng turah Kilometre 1.5 thui lei verh tawh

Bairabi aṭanga Sairang inkara rel kawng siam turah ngawrh taka hna thawh mek a ni a; Bairabi aṭanga lei verh hna thawktu Naik Infra. Pvt. Ltd. chuan lei verh tur hmasa ber verh mekin, kilometre khat leh a chanve vel an verh tawh.

Naik Infra hotute chuan, tuna lei an verh mek chu lei verh tur zinga thui ber tur a ni tih sawiin, harsatna lian tham an tawh loh chuan an lei verh mek chu kum hnih chhunga zawh an inbeisei thu an sawi.

Naik Infra hi Bairabi-ah an inbun a, Bairabi - Sairang rel kawng siam turah hmun 22-ah lei an verh dawn a; lei verh tur thui zawng belhkhawm chu km. 9 a ni. Tuna an verh mek, an bul ṭanna chu km. 2 tling lo deuh an verh dawn a ni.

Naik Infra hotute chuan, kawng ṭhat tâwk loh vangin hmanraw phurh luhnaah harsatna an tawh thu te, pawl ṭhenkhat, thawmlawm khawn ngun deuh an awm ṭhin a, chungte chuan har­satna an siamsak ṭhin thute an sawi.