AH&Vety Minister-in Hatchery Farm hawng

AH&Vety minister C Ngunlianchunga chuan nimin khan Tanhrila Indbro Poultry Hatchery Farm a hawng. Minister chuan, AH&Vety department-in sa, bawnghnute leh artuia Mizorama intodelh theih nan nasa takin hmalak mek a nih thu a sawi.

C Ngunlianchunga chuan, Mizoram chu ran vulhah a intodelh loh avangin NLUP second phase-a vawkte lei tur 40,000 chuang chu Myanmar aṭanga lei a nih thu a sawi a, "Sa, bawnghnute leh artuiahte intodelh mai ni loin, state páwna thawn chhuak thei turin nasa taka hmalak a ni," a ti.

AH&Vety Minister chuan, Indbro Poultry Hatchery Farm hawn tâk chu ar leh artuia Mizoram intodelhna tura hmalakna a nih thu a sawi a; Mizoramah kum khatah artui nuai 371 vel state dang aṭanga lak luh ṭhin a nih thu sawiin, "Artui leh ar notê hi state páwnah thawn chhuakin, sum lak luh nan kan la hmang zawk dawn a ni," a ti.

C Ngunlianchunga chuan, vawka intodelh tur­in RVKY hnuaiah Thingsulthliahah vawkpui 200 chuang vulh tum a nih thu sawiin, kum tin vawk 7,000 - 8,000 vel thar beisei a nih thu a sawi bawk.

AH & Vety Minister hi parliamentary secretary pahnih Lt. Col. ZS Zuala, H Zothangliana leh Lalthanliana, MLA ten an ṭawimawm.

Indbro Poultry Hatchery Farm hi cheng nuai 464.5 sênga din a ni a, AH&Vety department, Poultry Development Society leh Indbro Research and Breeding Farms Private Limited, Hyderabad ten ṭangruala an din a ni.