College admission atan hma la
Zirlai pawl pahnih - Mizo Zirlai Pawl leh Mizo Students Union-te chuan pawl 12 pass tharte’n college admission an hmuh vek theih nan hma an la.
MZP chuan, kum hmasa lamah college admission-ah zirlai harsatna leh buaina tawk an awm ṭhin chu pawi an tih thu sawiin, “Zirlaite harsatna tawh ṭhin tihkian nan ruahmanna felfai tak siam turin Mizoram sorkar kan ngenin kan phût tlat a ni,” an ti.
MZP chuan, HSSLC 2015 result-ah kum hmasa aiin zirlai pass chhuak 817-a an tlem zawk avangin college admission-ah harsatna tawk an awm loh an beisei thu an sawi a; zirlai zawng zawngte’n admission an chan ṭheuh theih nan ruahmanna siam turin sorkar an ngen a ni.
College admission chungchangah hian MSU hruaitute chuan May 15, 2015 zan khan Higher & Technical Education minister R Romawia an hmu a; pawl 12 pass tharte’n college admission-ah harsatna an neih loh nan ruahmanna awmze neia kalpui tur leh morning college emaw, evening college emaw siam belh turin an ngen.
Minister R Romawia chuan, sorkarin morning/evening shift anga college-ah zirna kalpui turin ruahmanna a neih mek thu leh 2015-16 academic session-a bul ṭan theih tura buaipui a nih thu a lo hrilh niin MSU chuan an tarlang.