DC hoin Lungleia kawng dan tum sawiho
Lunglei DC chuan nimin khan a pisaah district official-te a kokhawm a; sikul kai hma duh loh vanga lungawi lohna chi hrang hrang Lungleia lantir a ni chu pawi a tih thu hrilhin, mipuite thlabár loa an awm theihna turin theihtawp chhuah zel a nih thu a sawi.
Lunglei DC chuan, sikul kai hma duh lo hian Lungleiah bandh, hunger strike leh DEO office kai turte dan a lo ni tawh tih sawiin, kawng dan tumtute chu an thil tum ṭhulh turin a ngen a, "Kawng dan hian Lunglei khawpui leh district chauh ni loin, Lawngtlai leh Saiha district-a chengte zawng zawng pawh a nghawng dawn a ni," a ti.
Meeting-ah hian sikul hun sawn duh lohna entirna kawng hrang hrang huaihawt ṭhin chu mipui ni tin khawsak phung leh zirlaite zirna kawnga tibahlahtu a ni thei ang tih an hlauh thu tarlan a ni.
Sorkar thuchhuah tarlan danin, sikul kai hun ṭan hma duh loh vanga May 7, 2015 aṭanga chaw ngheite chu district hotute'n an tlawh reng a; DC office, magistrate, police leh medical lamin chaw ngheite chu an hriselnain a tuar lutuk dawn avangin hunger strike titawp turin an ngen ṭhin a, an zinga chau deuhte chu damdawi-in panpui ṭhin an ni.
Hetih lai hian, Lungleia Sikul Ṭan Hma Duhlo Pawl invuahte chuan tukin zing dar 6 aṭangin tiamchin awm loin Lunglei pawhtu kawngpuite dan an tum a; Lunglei khaw chhunga kawngpuite erawh chu dan an tum lo thung.