Bomb hmanga lui sangha mantute hrem ngei turin BIOCONE-in an phût

Biodiversity and Nature Conservation Network (BIOCONE) chuan thuchhuah siamin, Phaizau khawtlangin lui dung an humhalh chhungah bomb hmanga luia nungchate tihhlum an ni chu pawi an tih tak zet thu an tarlang a; dan bawhchhetute hrem ngei an phût thu an puang.

BIOCONE chuan, Phaizau khuain lui an humhalh chhunga bomb hmanga sangha man chungchangah hian, "Pawi khawihtute leh dan bawhchhetute chhui chhuak a, an phu tâwk hremna lekkawh ngei turin thuneitute kan phût tlat a ni. Nungchate chunga hleilenna lantirtu zinga ram rorel kháwl zinga mi a hming a lang ve hi vanduaithlak kan tiin, pawi kan ti tak zet. Dan bawhchhetu dangte nen ang khata rorelna an tawn ngei kan phût tlat bawk," an ti.

Khaw hrang hrangin an khaw ram huam chhunga lui dunga nungchate an humhalh ṭhin chu an ngaihhlut thu sawiin BIOCONE chuan, "Kan ram rohlu nungchate humhalh kawnga an inpekna fakawm kan ti tak zet a ni," an ti a; nungcha humhalh kawnga mi tlawmngaite inpekna tihnual thei záwnga dan bawhchhiatna kawngah sorkar mite an inhnamhnawih thu hriat tur awm tawh lo se an duh thu an sawi bawk.