Sorkar insawifiahna a tenawm - Congress ṭhalai

Mizoram Pradesh Youth Congress Committee (MPYCC) chuan thuchhuah siamin, wireless radio system lei chungchanga sorkar (Health department) insawifiahna chu tenawm an tih thu an tarlang.

MPYCC chuan, Covid-19 léng vanga sum renchem mek a nih laiin, Mizoram sorkarin hripui denchhena chhiah a tihpun hmanga mipui sum a rawk mai bakah, sum siam nan bungrua to uchuak taka a bika thlante hnena a supply tir nia sawiin, thil pawi leh lungchhiatthlak a nih thu an tarlang a, 'Health & Family Welfare department-a Purchase Committee Meeting on Mizoram State AYUSH Society-in wireless radio system set khat to taka a lei hnua sorkar a insawifiah leh hi a tenawm zawk," an ti.

Sorkarin a sawifiahnaah, BL Wireless System, Ramhlun Venglai-in Rs. 12,40,000-in wireless radio system set khat a supply thu tarlang chungchangah MPYCC chuan, "Mizoram sorkar hian hei hi lo hria se, BL Wireless System chauh lo, Mizo ṭhalai tam tak hian wireless radio system hi cheng nuai tam taka tláwm zawkin an supply thei a ni," an ti a; hripui léng denchhena a rûk a rála sum siam nana Mizoram sorkarin hma a la fo chu tenawm an tih thu an sawi.

Congress ṭhalaite chuan, wireless radio system set khat Rs. 12,40,000-a lei chu a to uchuak hle nia sawiin, "Hripui lên laia chhungkaw pa berin thla khat hlawh hripui do nan an pek ṭhak ṭhak lai a, hlêp tam uchuak taka a rûka sorkarin mimal hnena wireless set a supply tir hi mipui zah lohna leh hripui denchhena duhsak zawngte vulhna chiang tak a ni," an ti.

Mizoram sorkarin mipui thawh khawm CM Relief Fund aṭangin mipui thleng phâk lo zirtirna pamphlet cheng nuai 10 sêngin a siam tawh tih sawiin MPYCC chuan, "Hei hi duhtawk loin, AYUSH hnuaiah vêk cheng nuai 10 séng bawkin a siamtir leh a ni. Ṭang­kaina nei tak tak lo, duhsak zawngte sum siamna atana sorkarin hripui léng hmanga hma a la ru zel hi mipui hmaah sawifiah zel turin kan phût," an ti a; hripui léng denchhena mimal suma induhsakna uchuak nei tawh lo turin an chah bawk.

MPYCC chuan Health department-in wireless radio set a lei anga a tarlante rate dik tak zawk nia an hriat an tarlang a; MPYCC tarlan leh Health department-in a tarlan rate chu a hnuaiah hian dah a ni.