MYC-in sipaia tling tharte kaltir

Mizoram Youth Commission (MYC) chuan nimin khan November 18, 2019-a Rajiv Gandhi Stadium-a sipai lâk rûnpui neih ṭuma tling mi 61-te chu an kalna tur hmun Assam Regiment Centre (ARC), Shillong-ah an tír thla.

Sipai lâk rûnpui neih ṭum hian mi 145 an tling a, an zinga mi 61 chu nimin khan Shillong-ah tirh thlak niin, mi dang 84-te chu September 10-11, 2020-ah tirh thlak leh a ni ang. MYC chuan sipaia tling tharte chu Aizawl DC leh Transport department hotute puihnain Shillong-ah an kaltir a ni.

MYC chairman Dr Vanlalṭanpuia, MLA chuan, Mizo ṭhalaite'n eizawnna kawng hrang hrang an neih theihna atan MYC-in hma a lâk zel tur thu a sawi a, "Mizo ṭhalai sipaia tling tharte ka lawmpui tak zet a ni," a ti.