AIR Aizawlin golden jubilee lawm

All India Radio (AIR), Aizawl Station chuan July 30, 2016 khan Vanapa Hall-ah an kum 50-na, golden jubilee an lawm a; chief minister Lal Thanhawla'n a hmanpui.

Chief Minister chuan, AIR Aizawlin kum 50 a tling ta chu a lawmpui thu sawiin, "Vawiin thlenga Mizoram mipuiin radio an la ngaithla leh an ngaihhlut chhan chu, a bul ṭantute leh thawk tawh zawng zawngte thawhrimna, inpekna, ṭhahnemngaihna leh rinawmna vang a ni," a ti.

AIR Aizawlin nasa takin mipui rawng an bawl ṭhin tih sawiin, Lal Thanhawla chuan, "Rambuai lai khan radio hi mipuite thleng phak huapzau ber a ni a, mipuiin an ṭangkaipui hle. Chanchinthar thehdarh mai bakah, zai leh hla thlan programme-te'n mipui an âwi
ṭhin a ni," a ti a; AIR Aizawlin a programme a tihchhuahte chu Mizoram mai bakah, state danga Mizo awmte leh Bangladesh leh Myanmar-a Zo hnahthlakte'n an hlâwkpui hle a, Zo hnahthlak insuihkhawmna hmanraw pawimawh tak nia a hriat thu a sawi.

Chief Minister chuan, AIR Aizawl chu tun thlengin ṭhalai leh zai lama talent nei
ṭhate chawikângtu leh vawrh lârtu pawimawh a la nih reng thu sawiin, Facebook, Whatsapp leh social media dangte awm tawh mah se, Mizo mipuite rilru leh thinglungah radio-in hmun a luah reng theih nan thawkte chu intuaihriam a, mipui titlei thei programme buatsaih kawnga ṭan la zel turin a fuih.

Inkhawmah hian AIR Aizawl director (Engineering) DR Lalro-puia'n AIR Aizawl bul
ṭan dante leh tuna an dinhmunte a tarlang a; India hmarchhaka AIR leh DDK hotu pahnih - addl. director general (Programme & Administration) DN Basumatari, leh addl. director general (Engineering) MS Ansari te pawhin thu an sawi.

AIR Aizawl golden jubilee lawmnaah hian hla inphuahsiak lawmman hlanna leh radio-a ṭum za aia tam hun hmang tawh te, top radio artist-te leh AIR Aizawl tana thawk tawhte hnenah ngaihruina an hlan a; radio artist-te'n hun an hman bawk.

AIR Aizawl Station hi July 31, 1966-ah din a ni a, India hmarchhaka AIR station zingah Guwahati, Shillong leh Pasighat-te hnua golden jubilee hmang palina a ni.

AIR Auzawl hian tun dinhmunah primary programme ni tin darkar 14 an tichhuak a, FM Zoawi chu ni tin darkar 8 an tichhuak bawk. AIR Aizawlah hian thawktu nghet 77 leh contract staff eng emaw zat an awm.