ṬKP din champha lawm

July 30, Inrinni kha Ṭhalai Kristian Pawl (ṬKP) din champha vawi 65-na a ni a, Mizoram hmun hrang hranga ṬKP unit leh bialte'n an lawm.

ṬKP unit ṭhenkhat chuan vantlang tana thil ṭha tihna ní atan an hmang a, thupui chu 'Remna siamtu' tih a ni.

Mission Vengthlanga Shalom unit chuan taksa leh nun hrisel neih pawimawhzia inzirtirna atan Inrinni zing khan Mission Vengthlang
aṭanga Zodin Square thleng kawng an zawh a; chhunah NPCDCS leh NPPCD nen ṭangkawpin an Kohhran Hall-ah awareness campaign leh free clinic an buatsaih a, mi 200 vel an inentir.

Aizawl Central unit chuan Chawnpuia Bethel Camping Centre-ah ei tur an pe. Bawngkawn unit chuan Zemabawka Cancer Hospital leh Cancer Khualbukah zanriah an buatsaihsak.

Lengpui bialte chuan Aizawl Civil Hospital tan thisen unit 41 an pe a, a petute mipa 36 leh hmeichhia panga an ni.