Damdawi man tlâwm zawrhna hawng

Damdawi man tlawm zawrhna, Jan Aushadhi Store leh Common Service Centre inkawp, Hruaizel Pharmacy, Vaivakawn chu Inrinni khan Health minister Lal Thanzara'n a hawng.

Health Minister chuan, Jan Aushadhi chu mipui damdawi tihna a nih thu sawiin, "Damdawi ṭha, man tlâwm taka leina a ni. Aizawl Civil Hospital-ah Jan Aushadhi Store hawn a lo ni tawh a, Mizoram chhunga district tinah hawn tuma hmalak mek a ni," a ti.

Jan Aushadhi Store hawnna inkhawm-ah hian bialtu councillor Zonun-sangi Fanai pawhin thu a sawi.

Sorkar thuchhuah tarlan danin, Jan Aushadhi Store-a damdawite chu a man to dan a zirin category pathum, A, B leh C-ah ṭhen a ni a; company hrang hrang siam damdawite nen a danglamna chu, a tuamna (packing) leh a cheimawinate a awm ve lo a, chu chuan damdawi man a tihtlawm phah a ni.

India hmarchhak state-te zingah Mizoram hi Jan Aushadhi damdawi dawr nei hmasa ber leh awm chhun a ni.