Sorkar ukilte chan tur bik siam a ni
Mizoram sorkar chuan sorkar ukilte kalphungah ṭhenkhat a her danglam a; Law & Judicial department-in hriattirna a chhuahah chuan, sorkar department-a thubuai awm tam zualnate chu group A, B leh C-ah ṭhenin, department vil bik tur advocate-te chanvo a siamsak.
Law & Judicial department-in kalphung a siamah chuan, sorkar ukilte'n an thubuai khawih bik an hriat chian lehzual theih dan siam a ni a; Gauhati High Court-a ding tur ukilte hlawh tur bithliah thar a ni. Supreme Court-a ding tura rawihte erawh bill system hmang thoa kaltir a la ni rih.
Law & Judicial department hotute aṭanga thu dawn danin, sorkarin
ṭha zawk tura a ngaih avangin Aizawl District Court-a sorkar aiawha ding
ṭhin ukilte chu department chan bik neihtir an ni a; an department chante chu hlawm thumah ṭhen a ni.
Group A-ah General Administration Department (GAD) leh Land Revenue & Settlement department-te an awm a; a vil turin standing councel R Lalremruata leh asst. standing councel pahnih Zothansangi leh Vanneihsiami te ruat an ni.
Group B-ah Finance, PWD, Environment & Forest leh Health department awmin, a vil turin standing councel Lalchhandama leh asst. standing councel pahnih RK Malsawmkima leh Lalthanmawii te an awm.
Group C-ah DPAR, P&E, School Education, Social Welfare leh department dang hming tarlan lohte an awm a; a viltu turte chu standing councel H Lalmuankima leh assr. standing councel Joseph Lalfakawma leh Lalrinpuii te an ni.
Sorkarin advocate a rawihte department chanpual a siam chhan hi, sorkar department hrang hrangte'n Court-a thubuai an neih tam vang leh ukilte'n an thubuai khawih an hriat chian theih nan a ni.
Standing councel-te tana kalphung thar hi Aizawl District Court-ah chiah kalpui a ni rih dawn a, district dang chu sum harsatna vangin kalpui tum a ni rih lo.
Sorkarin ukil a rawih dan chu mipuiin an hriat chian theih nan Law & Judicial department hotute chuan sawifiahin, district level, Gauhati High Court Aizawl Bench, High Court Principal Bench leh Supreme Court-ahte ṭhen a ni.
Tunah hian Supreme Court-a Mizoram sorkarin standing councel atana a ruat chu PP Sharma a ni a, amah pui turin Madhoo Sudhand an ruat a, Advocate on Panel tih a ni. Anni hian Supreme Court-a Mizoram sorkar thubuai an dinpui bakah, National Green Tribunal-ah thubuai a awmin sorkar aiawhin an lo ding ṭhin a; PIL case an khawih tlangpui.
Standing councel tih hming hi India rama state dang zawng zawngin an kalpui angin Mizoram sorkar pawhin a kalpui ve mek a; Cabinet meeting chuan December 14, 2015 khan a lo pawm tawh a ni.