KHAWTHLIR

Inneih pawlh duh lo

MZP headquarters, Kolasib chuan, Mizo ram leh hnam a him a, Mizote chîmrala an awm loh nan leh a ram leilung fate'n an chanvo dik tak an chan theih nan hnam dang nena nupui pasala inneih pawlh loh ṭha an ti. MZP headquarters, Kolasib huam chhungah nasa taka ṭan lak an tum thu puangin, "Tuna hnam dang nupui pasala lo nei tawhte chungah pawh kan thîkthu a chhe hle dawn a ni," an ti.

Thisen pe

Inrinni khan Lengpui Branch KṬP-te an din champha pualin Synod Hospital tan thisen unit 38 an pe a, a petute mipa 33 leh hmeichhia panga an ni. Aizawl Civil Hospital-ah Mizoram Chakma Student Union member mipa 32-te'n unit unit 32 an pe a; Thanglailung Student Union pawhin unit 12 pein, a petute mipa 10 leh hmeichhia pahnih an ni. Kawnpui Chhimveng Branch YMA-in an platinum jubilee (kum 75-na) pualin Kolasib District Hospital tan unit 47 an pe a, a petute mipa 36 leh hmeichhia 11 an ni.

Zirlai thar lawm

Tuichangral Zirlai Pawl chuan, Inrinni khan Aijal Club-ah an member tharte lawmna leh zirlai tiṭhate chawimawina hun an hmang a, minister R Lalzirliana leh Mizoram State Commission for Women Vanlalawmpuii Chawngthu, MLA ten an hmanpui. Tuipuiral Zirlai Pawl pawhin IPR auditorium-ah zirlai tharte lawmna hun an hmang a, bialtu MLA leh Mizoram Youth Commission chairman T Sangkunga'n a hmanpui.

Tuilianin la

July 30, Inrinni tlai dar 5:30 vel khan Chalbuanga s/o Chunglura (L), Zawlnuam Vengpui chu Langkaih lui hleuh kai a tum laiin a chesual a, tuiin a la. Chalbuanga hi Inrinni zana tlaivara zawn hnuah nimin khan nilengin zawn a ni a; he thu ziah lai thleng hian hmuh a la ni lo.

Lungphun hawng

Sihphir Venghluna Sihphir khaw hming put chhan, Sihphir lui chhinchhiahna lungphun chu Inrinni khan bialtu MLA R Lalrinawma, Assembly deputy speaker-in a hawng. Lung phun hi a dung ft. 5 leh a vâng ft. 4 a ni a, a siam nan MLA fund, Art & Culture department leh V/C aṭangin sum hmuh a ni.