Food security Act hnuaiah BPL awm tawh lo Buhfai, khawnvartui etc. chân tur a awm lo
Food, Civil Supplies & Consumer Affairs (FCSCA) de-part-ment hotute chuan, Food Security Act hnuaiah BPL a awm tawh lo tih sawiin, hei vang hian buhfai, khawn-vartui leh thil dangah harsatna a awm phah dawn lo niin an sawi. Hetih lai hian, mithiam
ṭhen-khatte chuan BPL tehfungah her rem ngai awma an hriat thu an sawi.
Supply department hotute sawi danin, Food Security Act (FSA) hman hma chuan APL leh BPL an awm a, mahse, FSA hman hnuah BPL a awm tawh lo a, chuti chungin ration buhfai bikah harsatna a awm lo. FSA-ah BPL paih a nih tawh avangin AAY leh priority household-ah ṭhen a ni.
Eirawngbawlna gas-ah chuan, Prime Minister scheme thar, Pradhan Mantri Ujjwala Yojana (PMUY) a awm a; PMUY hnuaiah thingtlanga BPL chhungkua an awm chuan a thlawnin gas connection pek theih a ni a, chhungkuaa nu ber hminga tih a ngai.
Khawnvartuiah chuan BPL tan tih deuh bik ni mah se, ration card nei apingin an la mai tih an sawi a; HIV vei zingah BPL chhungkua an awm chuan AAY an dawng thei ṭhin a, mahse, FSA kalpui a nih hnuah Central aṭangin tih chhunzawm tur a ni nge ni lo tih hriat a la ni lo a, FCSCA hotute'n Central-ah an zawtfiah mek a ni.
Mithiamte thlir dan
K Riachho, IAS (Rtd.) chuan, BPL baseline survey stage 1-ah four wheeler, two wheeler, computer/laptop, telephone, washing machine, refrigerator eng emaw zat nei tih chu a number bithliah loh chuan survey tituteah a innghat a, uniformity a awm thei lo tih a sawi a, "Heng thilte hi neih em em vang pawh ni lo, sorkar ṭanpuina hmuh aṭanga leite an nih chuan an retheina a ngai reng dawn a, chhungkaw dinhmun dang criteria nen en kawp loh chuan a fel lo thei," a ti.
BPL chhungkuaa awm tur teh-naah, rangva/di in, a bang atan plas-tic/polythene hmang tih chung-changah, plastic/polythene bang kher phût chu a dik loa a hriat thu sawiin, K Riachho chuan, "Mau bangte pawh ti zawk se. IAY emaw rangva ṭanpuina emawa an sak chuan disqualify lo bawk se. Katcha house room khat chauh neih tih pawh hi a tê lulai a, Katcha house hi chu eizawnna nghet an neih loh chuan elgible-ah pawm ṭhain ka hria," a ti.
Mizorama inhlawhfate ni khat hlawh chhûtin, daily labour hlawh khawpuiah Rs. 2,100 leh thingtlangah Rs. 1,800 tih hi chu a tlem deuha a hriat thu leh, sorkar laipuiin phaia chengte mila tehna a siam chu tlang rama awmte tan tehna dik a nih loh theih thu a sawi bawk.
Dr James LT Thanga, Mizoram University (MZU) Economics department-a assistant professor chuan BPL baseline survey neih meka tehfung chungchangah, Mizo society chu inkungkaih ṭha a nih avangin chhungkaw rethei tak, inhlawhfaa nung ve ṭâwk ṭâwkte pawh an chhungte'n TV, washing machine,, etc hman hlui an pek
ṭhin tih a sawi a; "TV, wahshing machine leh thil dang an neih vang ngawtin a retheih loh phah chuang lo. Vawi khat ran vulh hralh ṭhat deuh ringawt pawhin a neih theih a, an hausa ta thut tihna a ni lo. Rethei an awm ta lo tihna lam aiin, sorkarin a tehna aṭangin BPL an awm ta lo mai a ni," a ti.
Dr James LT Thanga chuan, sum thawk chhuak tura an theihna leh sum hnár innghahna tlak leh tlo an neih leh neih loh chu tehfung atan hman chi nia a hriat thu sawiin, "Khaw tinah BPL hi zawng ta ila, khawsak phunga vantlang hnuai lam deuhte chu khaw chhung mite'n an hriat chian avangin BPL dik tak an ni ang a, tehna rintlak takah ngaih a ni," a ti.
"Tuna kan criteria hman mekte hi chu tunah pawh hian mi tam tak tan chuan basic necessity pawh a ni pha mang lo a, hun kal zelah a hman tlak rei lo ang," a ti bawk.
Lallianchhunga, Mizoram Univer-sity-a Political Science asst. professor chuan, "Sorkar Laipui tehna bawhchhe si loa mahni state mila BPL list siam mai hi a finthlak tawh mai thei a, sorkar laipui tehna fîr tak kan hman vanga kan state-a BPL list tihtlem hi a tak taka kan hmasawnna lan chhuahna tur a ni lo. Tuna BPL list-a chhungkaw tam tak hi paih ila hma kan sawn phah kher lo ang. Duhthusamah chuan, ‘Rethei chumchhia’ hrilhfiahna hi mahni state milin nei vek thei ila a ṭha ang, " a ti.
Mizoram chu ei leh in man tona hmun a nih avangin chhungkaw rethei ber pawhin an mamawh senso aṭanga chhûtin, BPL-a awm tur an nih loh laiin, sorkar aṭanga BPL chhungkaw ṭanpuina pek mamawh ngawih ngawih an awm thei tih sawiin, Lallianchhunga chuan, "Chhungkaw rethei chumchhia, sorkar laipuiin BPL chhungkuaa a vuah tlak khawpa rethei kan tam loh laiin, sorkarin BPL chhungkua a tihte tana thil a pekte dawn duh vanga chhungkaw tam tak kan insawi retheih lutuk avangin Mizoramah BPL chhungkua tam anga ngaihna a lian hle," a ti. Hei hi a chhan chu, sorkar Laipuiin BPL tehfung a hman hmanga tehna kan lo siam ve vang a nih thu a sawi.