PRRS lên chhan NLUP vawk note sem vang a ni lo tih finfiah - NIB

NLUP Implementing Board (NIB) hotute chuan, Mizorama vawk natna, PRRS léng chu NLUP hnuaia vawkte sem vang a ni lo tih an finfiah niin an sawi.

NIB hotute hian nimin khan NIB conference hall-ah thuthar thehdarhtute an kâwm a; NIB vice chairman PL Thanga chuan, "Thu belchian dâwl lo a léng vel a, tunah chuan PRRS lèn chhan hi NLUP hnuaia vawkte sem aṭangin a ni lo tih finfiahna chi tinrengin finfiah a ni tawh. Tun thleng hian NLUP hnuaia vawk dawngtu vulh chhunzawmte vawk chu a la himdam a ni," a ti.

PL Thanga sawi danin, thuthang léng vâk a tam avangin PRRS vanga vawk thih tamna ber Champhai district-a PRSS lênna hmun nia ngaih V/C area 21-ah survey neih a ni. V/C 21-a chhungkaw 292-in vawk notê 1,752 an dawn chu chipchiar taka zir chian a ni a, chuta ṭang chuan NLUP vawk notê vangin PRRS a leng lo tih finfiah a ni.

Survey report-ah hian NLUP dawngtu te, NLUP Monitoring Committee chairman leh Champhai District Vety officer-te'n hming an ziah hnan a ni.

Zawhna chhangin NIB Vice Chairman chuan, NLUP hnuaia vawk semte PRRS vanga an buai loh chhan an hriat chian bik loh thu a sawi a, "Vawk dawngtute hi uluk taka training pek vek an ni a, chu vangte pawh chu a ni mai thei," a ti.

PL Thanga chuan, June 19, 2013-ah Mizoramah PRRS a lêng tih finfiah a nih thu sawiin, "India rama a vawi khat lenna a nih avangin sorkar laipui lam pawhin tih dan tur an hre bik lo," a ti a; hetiang a nih avang hian UN agency Food and Agriculture Organization (FAO) puihna ngen a nih thu a sawi.

PL Thanga sawi danin, FAO hian PRRS buaipuina atan concept note an siam chu September 13, 2013-ah an thawn a, chumi hnuah concept note changtlung zawk an buatsaih leh a ni. Concept note zûlzuiin PRRS do hna ngawrh taka thawh a nih avangin kum 2013 hnu lamah PRRS case thar hmuh a ni lo.

PRRS dona atan hian FAO hmalaknain district pangaah training of trainers chu neih a ni tawh a, district dang pathumah neih leh tur a ni. Vawk vulhtute pawh training pek an ni bawk.

PRRS lên chungchanga AH&Vety department hmalakna ṭha tâwka an hriat thu sawiin NIB Vice Chairman chuan, "An hmalakna hian rah ṭha a chhuah a, harsatna tâwkte pawh a chhâwk ngeiin ka ring tlat a ni," a ti.