SIPMIU-in chhungkaw 61,950 hnenah bawlhhlawh báwm 1,23,950 an sem tawh

State Investment Programme Management and Implementation Unit (SIPMIU) chuan, Aizawl-a chhungkaw tinte bawlhhlawh
ṭawih thei leh ṭawih thei lo thliarna tura bawlhhlawh báwm an sem chu an zo tawh a, bawlhhlawm báwm 1,23,950 an sem. Bawlhhlawm báwm hi pakhat Rs. 186.96 man a ni.

SIPMIU hotute hnen aṭanga thu dawn dan-in, SIPMIU hian Aizawla chhungkaw tinte'n bawlhhlawh ṭawih thei (biodegradable) leh ṭawih thei lo (non-degradable) thliar hranna tur bawlhhlawh báwm semna atan hian kum 2014-ah pilot project tih vuahin veng panga - Laipuitlang, College Veng, Nursery Veng, Chawnpui leh Kanan Vengahte bul an ṭan.

Pilot project hnuaia thla ruk chhunga veng pangaa bawlhhlawh báwm an sem hnuah, kum 2015 chawhnu lam aṭangin veng dangah an sem leh a; veng 83-a chhungkaw (household) tinah bawlhhlawh bawm chi hnih - a rawng hring leh pâwl an sem leh a, chhungkaw 61,950-ah bawlhhlawh báwm 1,23,950 am sem zo tawh.

Bawlhhlawh bâwm lei nan hian SIPMIU chuan cheng nuai 247.03 an hmang a, bawlh-hlawm báwm pakhat man Rs. 186.96 a ni. Bawlhhlawh báwm supply-tu aṭangin báwm 1,32,200 an dawng a, chung zinga 599 chu hnâwlin, 1,31,601 an pawm a ni.

SIPMIU hotute chuan, bawlh-hlawh ṭawih thei leh ṭawih thei lote chu a paihnaah thliar hran ni rih lo mah se, thliar hranna turin hmalak mek a nih thu an sawi a; chuta tan chuan bawlhhlawh paih motor eng emaw zat lei thar tur a nih thu sawiin, "Bawlhhlawh
ṭawih thei leh ṭawih thei lo a hranga phurtu tur motor eng emaw zat lei tum a ni a, lei a nih hnuah a buaipuitu tur AMC hnenah hlan a ni ang," an ti.

SIPMIU hotute sawi danin, bawlhhlawh paih motor lei nan cheng nuai 534 ruahman a ni a, 407 truck ang chi 50 leh pick-up ang chi 40 lei tum a ni.

Motor-te chu bawlhhlawh paihna tur a nih avangin a bik taka a body sak a ngai dawn a; tender an chhuah dawn hnai tawh. Bawlhhlawh paih motor an lei hnuah chuan bawlhhlawh ṭawih thei leh ṭawih thei lote chu a hranpaa phurh tum a ni.

SIPMIU chuan bawlhhlawh lak khawm nan wheel barrow eng emaw zat lei tumin rua-hmanna an siam bawk a, chuta tan chuan cheng nuai 18 ruahman chhin a ni a; bawlhhlawh khawih veltute hman atan leh hmunphiat--
tute hman atan kutkawr (glove), pheikhawk (boot) leh uniform-te lei an tum a; chuta tan chuan cheng nuai 12 ruahman chhin a ni bawk.

SIPMIU hotute chuan, Aizawla chhungkaw tinte'n bawlh-hlawh ṭawih thei leh ṭawih
thei lo an thliar fel theih nan a remchanna hmun apiangah inzirtirna an kalpui ṭhin a, Aizawla veng hrang hrangah mipuite an zirtir tawh tih an sawi.