Ruihhlo donaa thawhho dan tur sawiho

Champhai DC Vanlalngaihsaka hoin, Champhai Sub-Hqrs. YMA, Police leh Excise & Narcotics department-te chuan August 2, 2016 khan Champhai DC conference hall-ah ruihhlo do kawnga thawhho dan tur an ngaihtuah.

DC Vanlalngaihsaka chuan, Champhai district chu ruihhlo kalkawng a nih avangin ruihhlo donaah ṭan lak lehzual a pawimawh thu sawiin, "Hmalak dan kan thiam zawk theihna turin kan dinhmun zir chian a ṭul. Ruihhlo hian rûkrûk leh pawikhawihna dang a ken tel tlat avangin theihtawp chhuaha do a ṭul tak zet a ni," a ti.

July 15, 2016-a Home Minister hoa Central YMA, Police leh Excise & Narcotics hotute ṭhukhawmin YMA kumpuan, 'Ram leh hnam humhalh' bawhzuina atana ruihhlo do an kalpui mekah an thâ tichak a, ruihhlo donaa hmasawn zel theihna turin thawhhona ṭha zawk neih a, August 5-ah ruihhlo do hawnna inkhawm buatsaih an rêl a ni.

Champhai district-ah pawh ruihhlo dona hawn inkhawm hi August 5-ah neih an rel a, a hmun atan DK Traffic Point an thlang.