Electric meter thar leitir tum sût turin phût

Aizawl khawpui chhunga MNF unit hrang hranga ṭhalai office bearer-te chu, nimin khan Mizo Hnam Rûnah an inhmukhawm a; resolution pass in, Power & Electricity department-in electric meter thar mipuite leitir a tum chu a rang thei ang bera sût an phût tih an tarlang.

MNYF Aizawl City Joint Block elected OB meeting hi MNYF president K Vanlalvena'n a kaihruai a, Aizawl khawpuia block 11 aṭangin elected OB-te an tel.

An resolution chuan, "P&E department hian
ṭul hauh loa mipuite sum sên ralna tur electric meter thar lei luihtir a tum mek hi a rang thei ang berin sût rawh se," a ti.

MNF resolution chuan, Mizorama kawngpuite a chhe lutuk nia sawiin, "CM Pu Lal Thanhawla hian helicopter-a thlawh khûm fo loin, lirtheiin zawh ve ngei se la, a rang thei ang berin siamṭhat hna thawk rawh se," a ti a; Central YMA duty-te'n gas tichingpentu an mante tun thlenga sorkarin criminal case a la siamsak lo leh a la hrem lo chu mak an tih thu leh, thil dik lo vulh lennaa an ngaih thu an tarlang.

MNF ṭhalaite chuan, Mizoram sorkarin buhfai supply-tu thlan chungchangah dan bawhchhiat nei loa an insawi lai leh buhfai supply-tu atan MIZOFED an thlang chunga tun thlenga MIZOFED hnena supply order an la pe ngam si lo chu mak an tih thu an sawi a, "Anmahni tih dik loh an pawmnaah kan ngai," an ti.

MNYF chuan, MNF-in zalenna a sual kum 50-pualin kuminah Aizawl City MNYF Joint Block Conference neih an tum thu leh, MNF president Zoramthanga’n remna leh muanna a thlen theih nana hmarchhaka hel pawl hrang hrangte leh India sorkar inkara palai hna a thawk chu ropui an tih thu an sawi bawk.