MHRD Minister-in Aizawl a rawn tlawh NIT-Mizoramah course hawn belh tum

Union minister of state for Human Resource Development (HRD) Prof. Ram Shankar Katheria chuan, National Institue of Technology (NIT) Mizoram atan cheng nuai 5300 pek tawh a nih thu leh kum 2015-16 chhungin Mizoram University tan cheng vbc. 8300 dah a nih thu a sawi a, "NIT-ah hian course dang hawn belh tum a ni," a ti.

Zan khat riaka Aizawla rawn zin HRD Minister hian nimin khan State Guest House-ah press conference a nei a; prime minister Narendra Modi kaihhruai sorkar chuan hmarchhak bial hmasawnna tur chu an thupui a nih thu a sawi.
Prof. Ram Shankar Katheria chuan, PM Narendra Modi thu angin, Union minister-te chu hmarchhak bial tlawh a, an ministry chan ṭheuha hmarchhak bial harsatna leh hmasawnna atana hmalak dan tur enfiah tura tih an nih thu a sawi a, "Ministry tinin development road map siam tur a ni a, HRD Ministry chuan road map kan peih tawh a ni," a ti.
NIT-Mizoram chungchanga zawhna chhangin Prof. Ram Shankar Katheria chuan, a tihpui­tlinna atan bul ṭan a nih aṭanga tun thlengin cheng vbc. 53 pek a nih tawh thu a sawi a, "Kum kal mekah cheng nuai 190 pek tawh a ni," a ti a; NIT-Mizoramah hian tuna course awm tawh pathumte bakah course tam zawk hawn belh tuma hmalak mek a nih thu a sawi.
HRD Minister chuan, Mizoram University tan kum 2014-15 chhungin Plan hnuaiah cheng nuai 4000 leh Non-Plan hnuaiah nuai 4300 pek a ni ang thu a sawi a, "Kuminah pawh kum hamsa aia tlem lo pek theih beisei a ni," a ti.
Prof. Ram Shankar Katheria chuan, hmarchhak biala central university tinah central school din tum a nih thu a sawi a, mahse hmun ṭhenkhatah chuan a hmunhma turah harsatna a awm thu a sawi a; Centrally Sponsored Scheme-ah state-te ṭha taka thawkho a, a ṭha thei ang bera kalpui an tum thu a sawi bawk.
MHRD-in SSA atana sum pek nasa taka a tihhniam chhan zawhna chhangin, HRD Minister chuan, "Central budget zawng zawng zinga 42% chu state-te chan tura dah a nih tawh avangin Central sum chan a tlem sawt a, a hma aiin Central-in sum a neih tlem avangin CSS atana sum pekte tihhniam a ni. Mahse, hmarchhak state-te bikah erawh chuan a tlahniam lo," a ti.
HRD Minister chuan, India ram hmun dangah leh Mizoramah zirtirtu indaih lohna a awm thu leh, hmeichhe zirlaite tan hostel a tam tawk loh thu a sawi a; chu'ng harsatnate chu chinfel a nih theih nan chak taka bawhzui a nih thu a sawi bawk.
Prof. Ram Shankar Katheria hi Assam University-a Prof. Nityanand Pandey chuan coordinator niin a rawn zui a, MHRD deputy secretary PK Saha leh OSD to Minister of State Dr BP Nilaratna ten an zui bawk. Nimina press conference a neih zawhah Mizoram a chhuahsan leh nghal a ni.