Serchhip district-ah in 346 sak zawh a ni tawh

Serchhip District Vigilance and Monitoring Committee chu an chairman Ronald Sapa Tlau, Lok Sabha MP hoin nimin khan Serchhip DC meeting room-ah an ṭhukhawm. He hunah hian IHSDP hnuaiah chenna in 350 sak turah 346 sak zawh tawh a ni tih an tarlang.

Meeting-ah hian Ser­chhip district chhung bialtu MLA Lalrinawma leh Centrally Sponsored Scheme kalpuitu line department hotute an tel a; Ronald Sapa Tlau chuan, Committee chuan CSS kalpui dan, harsatna awmte leh a sutkian dan tur te, hmalak zel dan turte ngaihtuah tu a nih thu sawiin, tihsual ringawt inkher an tum loh thu a sawi.

Meeting-ah hian, Serchhip district-a nausen thihna, Infant Mortality Rate sân chhan chu nuin nau a pai lai leh hnutê a pek laiin Thiamine (Vitamin B1) an tlakchham vang a ni pakhat tih sawi a ni a, Thiamine tlak­chham chhan chu nuin nau a pai laia kuhva, vaihlo leh zu tih vangte a nih thu sawi a ni.

Meeting-ah tarlan dan­in, UD&PA department kaltlangin IHSDP hnuaiah mirethei chenna in 350 sak turah 346 sak zawh a ni tawh a; Swarna Jayanti Shahari Rojgar Yojana (SJSRY) hnuaiah kum 2011-15 chhungin Rs. 28,00,000 hmuh tawh ni tawhin, mi 365-te training pek an ni tawh a; UWSP hnuaiah Rs. 15,90,000 hmu tawhin, self help group 44 din a ni tawh. UWEP-a sum hmuh Rs. 15,70,000 chu hman zawh tawh a ni a; USEP hnuaiah Rs. 16,67,000 hmuh tawh chu mi 32 hnenah loan leh subsidy anga pek chhuah vek a ni tawh bawk.