Mizoram chhunga district pangate Open defecation free-ah siam tum

Chief minister Lal Thanhawla chu nimin khan Haryana Niwas, Chandigarh-a Swatchh Bharat Mission (SBM) Sub-Group meeting vawi hnihnaah a tel a; kumin chhungin Mizorama district panga chu khawlaia inthiar awm lohna - open defecation free-ah siam tum a nih thu a sawi.

CM Lal Thanhawla chuan, India ram, ram fai ni tura PM Narendra Modi hmalakna fakawm a tih thu sawiin, "Faina beihpui thlak hi kan tumruhnaah a innghat thui hle dawn a. Mizoram chu zunram inthiarna lamah kan ziaawm hle a, khawlaia dáikal hmuh tur kan awm lo," a ti. Mizoram sorkarin faina a ngaih pawimawh avangin kum 1977 aṭang­in kum tin ‘Faina Hapta’ hman ṭhin a nih thu a sawi.

Lal Thanhawla chuan, Mizoramah Faina Hapta hman ṭhinin rah ṭha a chhuah tih sawiin, "Mipui 80% chuan inthiarna hmun kan nei vek a, 100% ni turin tan kan la chho dawn a, hemi atan hian chief secretary kaihhruai High Power Committee din a ni," a ti.

Chief Minister chuan, faina lama beihpui thlak nan kum 2015-16 chhung atan Mizoramin cheng vbc. 35 vel a mamawh tur thu sawiin, sum mamawh chu Central-in a tihhlawhtlinsak ngei a beisei thu a sawi a, "Faina tluantling nei turin mi zawng zawng kan tel vek dawn a, kumin chhungin district panga chu khawlaia inthiar awm lohna - open defecation free-ah siam tum a ni," a ti.

Meeting hi Andhra Pradesh Chief Minister-in a kaihruai a, Haryana Chief Minister-in meeting-a tel zawng zawngte chu a mikhual a ni. Meeting-ah hian Maharshtra CM, Delhi leh Uttarakhand minister-te an tel a; NITI Ayog-a CEO-te bakah, Central ministry hrang hrang officer-te an tel bawk.