Union Minister-in MZU building a hawng

Union minister of state for Human Resource Development Prof. Ram Shankar Katheria chuan Thawhṭanni tlai khan Mizoram University-a examination building a hawng.

Prof. Ram Shankar Katheria chuan, MZU chu kum 14 leka upa ni mah se, kawng tinrengah hmuh theihin hma a sawn tih a sawi a, "A changtlung hi a fakawmin a lawmawm hle. Ram hmasawnna turin zirna ṭha a pawimawh a, zirna ṭha nei turin university tihchangtlun a, zirtirtu ṭha neih a ṭul. Hei hi Prime Minister pawhin a ngaih pawimawh berte zinga mi a ni," a ti.

MZU hmasawnna tura HRD Ministry-a rawtna an thehluhte uluk taka lo en zui a tum thu sawiin, Prof. Ram Shankar Katheria chuan, "Prime Minister duh dan ang takin university tihchangtlun a, hmarchhak tihhmasawn tum a ni," a ti.

MZU examination hall thar hi cheng nuai 575.41 sênga sak a ni a, January 4, 2013-ah sa ṭan in, February 28, 2015-ah sak zawh a ni a; sq.metre 1,803-a zau a ni.

Examination building hawn zawhah Union Minister hian Higher & Technical Education secretary K Lalnghinglova leh Education department officer-te a kawm a; MZU Student Council leh Executive Committee te, Mizoram University Teaching Association leh Mizoram University Non Teaching Staff Association (MUNTSA) aiawhte leh Mizoram Hindi Training College zirtirtute a kâwm bawk.