Mamit post-ah dah let turin sorkar phût

PRISM sub-headquarters, Mamit chuan thuchhuah siamin, SSA Mission, Mamit district hnuaia thawk mi 35 chu district dangah dah (attached) mek an ni tih an tarlang a; ṭha lo an tih thu leh a rang thei ang bera an post pangngaia dah let tura sorkar an phût thu an puang.

Mamit PRISM chuan, RTI Act hmanga an zawhna chhannaah, Mamita SSA hnuaia thawk, district danga dah mek zat chu mi 35 angin chhan ni mah se, mi dang paruk an la awma an hriat thu an sawi a, "RTI chhannaah mi parukte hi eng vanga tel ve lo nge an nih sawifiah turin SSA SPIO hi kan phût a ni," an ti.

Mamit PRISM tarlan danin, Mamit SSA hnuaia thawk, district danga dah mekte chu Aizawl leh a chhehvela dah an ni ber a, a rualin vawi khata sawn an ni lo a, ṭhenkhat chu joining report an pek zawh veleh Aizawl lama lak chhoh nghal an ni.

SSA Mamit DPO aṭanga hlawh la reng si, district danga thawk eng emaw zat an awm chu sorkarin Mamit district mipui­te hlamchhiahzia tilangtuah an ngaih thu sawiin, PRISM chuan "Ná pawh kan ti hle. Mamit District SSA hnuai­a thawk, hmun danga dahte hi Mamit district-ah ngei an let leh theih nan a tawp thlengin kan bei dawn a ni," an ti.