Governor-in Lalbiakthanga lawmpuina thilpek a hlân

Mizoram aṭanga kumina Padma Shri award dawng tura thlan prominent journalist Lalbiakthanga Pachuau, Chanmari, Aizawl chu Governor PS Shreedharan Pillai-a'n a sawm angin February 1, Inrinni khan Raj Bhavan-ah a lêng a, Governor chuan thingpui nen a hlawhtlinna a lo lawmpui a, lawmpuina thuziak leh pawisa a lo hlân.

Governor chuan, India ram mipui vaibelchhe 134 zingah Mizoram mi pahnihin India rama vantlang mi chawimawina sang an dawng thei chu ropui a tih thu sawiin, "Pu Lalbiakthanga Pachuau nun aṭang hian keini khua leh tuite pawhin entawn tur kan nei. A rawngbawlna hi state mipui leh India mipui tan a ni mai lo a, democracy tana rawngbawlna ropui tak a ni," a ti a; a hnathawh ṭhat chu Mizoram mipui leh a thawhpui chanchinbumite zawng zawng tan in­chhuanna tham a nih thu a sawi.

Labiakthanga Pachuau pawhin thu sawiin, a lawmman dawn chungchangah Pathian leh mipui­te hnenah lawmthu a sawi tih a sawi lang a, "He chawimawina ka dawn theihnaah hian ka thawhpui chanchinbumite zawng zawng phungbawmna leh kaihruainaah te, Association of Voluntary Blood Donation (AVBD), Mizoram leh Mizoram Social Defence Council ten min puihnaahte ka lawm tak zet a ni," a ti.

Padma Shri award hi Lal­biakthanga Pachuau hian literature, education-journalism huangah a dawng a ni. Amah hi British India Army-ah a ṭang ṭhin a, sipai a ṭan chhungin award eng emaw zat a dawng. Sipai aṭanga a chawlh hnu kum 1953 aṭangin ni tin chhuak chanchinbu Zoram Tlangau a chhuah a, Mizoram Journalists' Association (MJA) General Headquarters-ah president ṭum thum a ni tawh.

Mizoram sorkar leh MJA ṭangkawp chuan Lalbiakthanga Pachuau hi kum 2018 khan 'India’s oldest working journalist' atan an puang a, tunah hian Zoram Tlangau editor a la ni mek. Association for Voluntary Blood Donation (AVDB) dintute zingah a tel a, kum 2001 aṭanga 2010 thleng general secretary a ni a, kum 2010 aṭanga 2014 chhung president a ni bawk.

Padma Shri award hi India khua leh tui mi chhuanawm leh hnathawk ṭha chungchuangte chawimawina sang ber zinga mi a ni a; Bharat Ratna, Padma Vibhushan leh Padma Bhushan tih lohah chuan ngaihhlut ber a ni. Lalbiakthanga Pachuau hian Padma Shri hi kuminah India President Ram Nath Kovind hnen aṭangin a dawng dawn a ni.