KHAWTHLIR

CSR buaipui

Adviser to CM TBC Lalvenchhunga, MLA chuan nimin khan Bangalore-ah corporate social responsibility (CSR) kaihhnawih hotu hrang hrang a kawm a; IIM, Bangalore-a NSRCEL hotute chu Mizorama start-up ecosystem ṭha zawk a awm theih dan tur a sawipui. TBC Lalvenchhunga leh amah ṭawiawmtute hi vawiin hian United Nations Development Programme CSR Conclave-ah an tel dawn a ni.

Dan thar zirho

Home department, Law & Judicial department leh Assam-a Judicial Academy-te chuan November 13-14, 2024 khan Aijal Club-ah executive magistrate-te tan criminal law thar pathum zirhona an buatsaih. Zirhona hi nimin khan khâr a ni a, kharna inkhawm hi Law & Judicial secetary TL Guite-in a hmanpui.

Kuhva leh heroin

Assam Rifles sipaite chuan November 13, Nilaini khan New Champhaiah ram dang kuhva dan loa lak luh kg. 4,900 an man. AR-te hian November 13 vek khan Edenthar Veng, Aizawlah heroin eng emaw zat an man a; November 12 khan Melbuk bulah heroin gram 113 leh Zemabawk Kawnvengah heroin gram 34.5 an man bawk.

Health Mela

Darlawn Welfare, Aizawl leh LBS Suzuki chuan nimin khan Darlawn damdawi-in (community health centre)-ah Health Mela an buatsaih. Mela-ah hian doctor 13 an tel a, mi 1,500 chuang an inentir. Damdawi eng emaw zat a thlawnin pek chhuah a ni.

YMA chanchinbu enkawltute training

YMA Sub-Headquarters, Serchhip chuan November 13, Nilaini khan an huam chhung YMA branch-a YMA chanchinbu enkawltute tan chanchinbu enkawl dan zirhona an buatsaih. Serchhip IPRO Lalnunmawii'n chanchinbu enkawl dan kalhmang leh Mizo ṭawng ziah dan a sawi a; assistant public prosecutor Lalrosanga Colney-in dan lam kaihhnawih thilte sawiin, district child protection officer Lalsiampuii Tochhawng-in naupangte dikna chanvo chungchang a sawi bawk.