Oil palm hmunpui in ni thei - DoNER Minister; DoNER Minister lo kal kan hlawkpui hle - CM

DoNER minister Jyotiraditya M Scindia chuan nimin khan lehlángin Mizoram a rawn tlawh a, Mizoram chu oil palm hmunpui a nih theih thu a sawi. Chief Minister chuan, "DoNER Minister lo kal hi kan hlâwkpui hle," a ti.

Jyotiraditya M Scindia leh CM Lalduhoma te hian nimin khan Planning conference hall-ah sorkar official-te an ṭhutkhawmpui a, chumi hnuah thuthar thehdarhtute an kâwm a ni.

DoNER Minister chuan, Mizoram hmasawnna ngaihtuah tura rawn kal a nih thu a sawi a, "Mizoram hmasawnna tura ṭha kan tihte leh rawtna kan neihte kan rawn thlen. Prime Minister suangtuahna, hmarchhak hmasawnna tur a hlawhtlin dan tur kan ngaihtuah a ni," a ti.

Jyotiraditya M Scindia chuan, hmarchhak state-te chu Asia chhimchhak ramte tan India rama an luhkapui a nih thu sawiin, "India ram hmasawnna leh ṭhanna atan hmarchhak state-te an pawimawh. Kum 10 liam ta khan infrastructure leh human resource lam atan pawisa kan pe nasa," a ti a; BJP sorkar hnuah hmarchhak state-te'n duhsak an hlawh niin a sawi.

DoNER Minister sawi danin, BJP kaihhruai sorkar a pian hnuah Mizoramin central share of taxes, grants-in-aid leh a dangte a dawn ṭhin chu nasa taka tihpun a ni.

Vanglaini palai zawhna chhangin M Scindia chuan, Mizorama oil palm processiong plant din belh chungchang Chief Minister nen ngun taka an ngaihtuah thu a sawi a, "Oil palm atan Mizoram hian theihna in nei ṭha a, chìn theihna ram hectare 6,000 vel a awm anga chhût a ni. Chìn mai bakah, processing leh branding atan pawh theihna in nei ṭha," a ti.

DoNER Minister chuan, Mizoram CM-in oil palm procesing plant a ngai pawimawh nia sawiin, "Khawiah nge processing plant bunna atan ṭha ang tihte Mizoram sorkar lamin a lo ngaihven ang a, ka rawn kal leh hunah sawiho a ni ang," a ti a; oil palm sawngbawlna din tura Mizoramin a mamawhnaah DoNER-in puih a inhuam thu a sawi.

Lalduhoma chuan, Jyotiraditya Scindia te chhungkua nen inṭhian hnai tak an nih thu sawiin, "A pa Madhavrao Scindia hi Civil Aviation, Tourism leh Human Resource minister a lo ni tawh a, India rama minister kan neih ṭhat ber zinga ngaih a ni. An chhungkua hi inkungkaihna ṭha hun rei tak ka neihpui tawh an ni a, ani pawh hi fapa ang maiin ka en," a ti.

Jyotiraditya M Scindia minister a nih hnuah Delhi a kal apiangin an inhmuh ṭhin thu sawiin CM Duhoma chuan, "Mizoramin harsatna kan neih ka thlenin, 'Ka pui ang che u, chinfel dan kan ngaihtuah dawn nia' a ti mai zel. Hnathawh duh mi a ni a, eng mah a tikhawmuang ngai lo," a ti a, Mizoramin an ṭangkaipui thu a sawi.

Chief Minister chuan, DoNER Minister chu anmahni ang thoa kalphung thar duh a nih thu sawiin, "A ministry chanah kalphung thar hmuh tur a tam tawh. A hoa meeting kan nei pawh kan hlâwkpui hle. Kan beisei loh turahte beiseina thar kan neih phah a ni," a ti.

Communications & Infor­mation Technology minister ni bawk Jyotiraditya Scindia chuan, Mizoram pumah ṭha taka Saturation of 4G mobile service kalpui a nih theih nan sum dah a nih tawh thu a sawi bawk.