Union Minister-in hna ṭha ngai pawimawh turin UDPA hotute a chah

Sorkar laipuia Housing & Urban Affairs minister of state Tokhan Sahu chuan November 13, Nilaini tlai khan Planning conference hall-ah Urban Development & Poverty Alleviation (UDPA) minister K Sapdanga leh department hotute a kâwm a; hna ṭha leh tlo ngai pawimawh tur leh eirûkna laka fihlim turin a chah.

MoHUA Minister chuan, Aizawl Smart City Ltd. hnuaia project-te chu March 2025 ral hmaa zo hman ngei turin Mizoram sorkar hotute a chah a, "Project zawh tawhte pawh ṭha taka mipui hriat theih tur leh an hman ṭangkai theih turin nasa zawkin hma la ang che u. In hnathawhah quality ngai pawimawh u la, eirukna kawngah fihlim ang che u," a ti.

India ram hmun tinah hmasawnna a awm theih nan sorkar laipuiin theihtawp a chhuah mek nia sawiin Tokhan Sahu chuan, "Hmasawnna lama plan in siamte chu hmathlir thui tak, kum 20 lo la kal tur thlir chungin ngaihtuah ang che u. Swachh Bharat Mission hnuaia IHHL (ek-in) sak tawhte scheme a zawh ruala tawp mai loin, a ṭul anga mipuiin an ṭangkaipui theih nan hmalak zel a ṭul," a ti a; PMAY-U scheme-ah pawh nasa zawka ṭan la turin a chah.

UDPA minister K Sapdanga chuan, Mizoram chu tlang ram a nih avangin MoHUA hnuaia project kalpui mekah hmanhmawhpui a, hnathawhna tur sum pe thuai tur te, Cyclone Remal-in AMRUT 2.0 hnuaia project a tihchhiatte chu a thara siamṭhatna tur pe tur leh, a ṭul anga hmalakpui a, second instalment pe thuai turtein Union Minister a ngen.

Aizawl Smart City hnuaia project 49 zinga 28 chu thawh zawh tawh a nih thu sawiin K Sapdanga chuan, "Project 16 chu March 31, 2024-ah zawh tura ruahhman a ni a, project panga chauh March 2024 hnu lama zawh hman tura beisei a awm," a ti.

Ṭhutkhawmah hian Aizawl Smart City hnuaia project - Swachh Bharat Mission-Urban, Atal Mission for Rejuvenation & Urban Transformation, Pradhan Mantri Awas Yojana - Urban leh Deendayal Antyodaya Yojana - National Urban Livelihood Mission-a hmalakna leh harsatnate sawiho a ni.

Aizawl Smart City chief executive officer CC Lalchhuangkima'n Smart City hnuaia hmalaknate a lem nen entirin a sawifiah a; UDPA director Dr Andrew Vanlaldika'n MoHUA kaltlanga centrally sponsored scheme pali hnuaia an hmalaknate a tarlang.

MoHUA Minister hian nimin khan New Delhi pan tura Lengpui Airport a panna kawngah AMRUT hnuaia Tennis Junction leh Raj Bhavan Fencing te, Aizawl Smart City hnuaia Aizawl Lungdawh (Smart Street) te, PMAY-U hnuaia Rangvamual leh Phunchawnga in sakte a tlawh a ni.

Tokhan Sahu hian November 13, Nilaini zan khan Mizoram BJP pisa-ah thuthar thehdarhtute kawmin, PMAY (insak ṭanpuina) la dawng kim lo an awm chu a ngaih pawimawh thu a sawi a, "1st Instalment chauh dawng tawhte leh dawng tura tih la dawng si lo, chenna in lo ṭhiat tawhte chu ngaihven turin state sorkar ka chah," a ti a, Mizoram BJP hruaitute pawh central scheme hrang hrangte mipuiin ṭangkai zawka an chhawr theih nana hma la turin a chah thu a sawi.