Capping & Lamp Lighting hun hmang

Blessino Nursing School chuan nimin khan Maubawka an auditorium-ah '6th Batch Capping & Lamp Lighting & 3rd Batch Graduation' an hmang a; minister of state Prof. Lalnilawma'n a hmanpui.

Prof. Lalnilawma chuan, nurse zir thar, zir mek leh zir chhuak hlimte chu mi dang tana rawngbawltu an ni tih inhria a, inpekna leh hmangaihna nen an mawhphurhnate ṭha taka hlen chhuah tum turin a fuih a, "Ṭawngkam ṭha hi damdawi pawimawh tak a ni," tiin, dawhtheihna nei a, mi dang dinhmun hrethiam tur leh rilru zau tak pu turin a chah.

Inkhawmah hian General Nursing & Midwifery zir zo mi 24 thlahna leh GNM zirlai thar mi 30-te lawmna hun hman a ni a; Civil Hospital, Aizawl nursing superintendent Lalrinthangi Pachuau-in zirlai tharte chu lukhum a khumtir bakah, bati chhiin nurse thutiam a sawirualpui a ni.

Blessino Nursing School hi kum 2019-ah din niin, Mizoram Nursing Council leh Indian Nursing Council pawmpui a ni a; kum tin zirlai 30 lak thar niin, GNM zir chhuak 83 an nei tawh. Zirlai 88, zirtirtu pakua leh thawktu dang 15 an awm mek a ni.