All India Cooperative Week hmang

Nimin khan India ram hmun hrang hrangah All India Cooperative Week vawi 71-na hman a ni a; Mizoramah pawh IPR Lianchhiari Rûnah lawm niin, Cooperation minister PC Vanlalruata'n a hmanpui. Week thupui chu 'Role of cooperatives in building Viksit Bharat' tih a ni.

PC Vanlalruata chuan, India ram chu hmasawnnaa ṭhang duang tak a nih sawiin, chumi ruala hmasawn ve tuma hna thawh a pawimawh thu a sawi a, "India ram hi kum 2047-ah developed country dinhmun ni turin chak takin ke a pên mek a, hemi tihlawhtling tur hian cooperative society anga hmalak a pawimawh," a ti.

Cooperation Minister chuan, khaw 800-ah primary agricultural credit society (PACS) din a nih tawh thu a sawi bawk.

Mamitah pawh IPR Conference Hall-ah Cooperative Week Celebration hman a ni a, Mamit district MJA president Lalhuma khuallian a ni. Lalhuma chuan, Mamit district-ah registered cooperative society 116 an awm thu sawiin, "Society-te hian Mamit district tihhmasawnna hna an thawk mek a ni," a ti.