Kolasib-ah alu chi ṭha sem

Krishi Vigyan Kendra (KVK), Kolasib chuan nimin khan KVK Golden Jubilee lawmna kal zelah loneitute tan alu chi ṭha (variety pasarih) leh natna laka enkawlna damdawi an sem a; Assembly deputy speaker Lalfamkima, Kolasib bialtu MLA-in a hmanpui.

Lalfamkima chuan, loneitute chu sorkar hmalakna leh Handholding Scheme thláwp tura ngenin, "A hlawhtlinna in kutah a awm. Kolasib district hi buh leh bâl thar turin theihna sang tak a neih laiin, huan enkawltu hnam dangte'n a hlâwkna an têl tam zawk hi a veiawm," a ti a; sorkar puihna leh a vantla nghah ringawtin hmasawnna a thlen loh thu a sawi.

Inkhawm hi KVK senior scientist Dr Michelle C Lalawmkimi'n a kaihruai a, alu chíng turte hnenah KVK mithiamte'n hriat tur pawimawhte an hrilhfiah a ni.