Congress kan sorkar leh a ngai - Dr Mala

Congress pary treasurer Dr Lalmalsawma Nghaka chuan, Zoram dung leh vâng a fannaah ZPM-a rinna nghatte an hnual ngawih ngawih hmel a hmu zel nia sawiin, Congress party an sorkar leh a ngaih thu a sawi.

Dr Lalmalsawma Nghaka hian nimin khan Aizawl South-II Block Congress Committee hruaitu thar inhmelhriat tawnna inkhawmah thu sawiin, "Zoram dung leh vâng ka fang mek a, ZPM-a rinna nghatte hnual ngawih ngawih hmel ka hmu zel. Ration buhfai lakna tur tuaka rûm hmel ka hmuhte hian hrehawm ka ti. Mipui mimirin káwl êng an hmuh theih nan Congress hi a sorkar leh a ngai," a ti.

ZPM chu sum enkawlah a hlawhchham ṭan nia sawiin Lalmalsawma chuan, "Chief minister Pu Lalduhoma, 'Bhavan ka lilâm ang' titu hian Zoram hi a hralh hreh lo ang tih a lang chiang hle, ram ro tling hralh an tum thâwm a ring hle a nih hi," a ti a; sorkar hmasa zawkte'n felfai taka an enkawl theihte chu vai sumdawng hausate hnenah hlan an tum thâwm a ri nasa niin a sawi.

MPCC Treasurer chuan, Mizoram chief secretary ruat chungchangah sorkar laipuiin Mizoram sorkar duh dan a ngaih pawimawh lohzia a lang nia sawiin, "MNF sorkar kal ta ang bawkin inthlan dawn khan tute emaw sum chakna hmang ve tho an nih vang a ni mahna, sorkarin a duh angte BJP sorkar hian a ngai pawimawh lo hle," a ti.

Dr Lalmalsawma chuan, Mizoramah Congress a sorkarin mipui thla a muan ṭhin thu leh Congress-in remna leh muanna nen ro an rel leh dawn thu a sawi bawk.