State pumah mock drill neih a ni
Nimin chawhma khan Mizorama district khawpui tinah leimin, tuilian leh kângmei vanga chhiatna thleng hmachhawn dan a taka zirhona leh chanhona, mock drill neih a ni.
Chawhnu lamah Mizoram State Disaster Management Authority (MSDMA), National Disaster Management Authority(NDMA) leh Ministry of Home Affairs tangkawp buatsaihin, Mizoram Legislative Assembly Secretariat Annexe conference hall-ah 'State Level Mock Exercise On Flood And Landslide in Mizoram' thlirletna neih a ni a, DMR Minister K Sapdanga'n a hman pui.
DMR Minister chuan Mizoram pum huapa tuilian leh leimin avanga chhiatna dang danga a lo thlen thulha chet lak dan tur enchhinna hlawhtling taka buatsaih a nih theih chu lawmawm a tih thu sawiin, "Mock drill hlawhtling tak buatsaih a nih theih nana thawktu zawng zawng chungah lawmthu ka sawi tak zet a ni," a ti.
Khuarel chhiatna lo thleng thulha kan lo inven dan tur leh kan tawrhna tinep thei tura chet kan lak dan tur nunchan lo zir thil tih makmawh a nih thu sawiin, "Tah duhawm tak a chhuah ngei pawh ka beisei hle," a ti a, kan hmalam hunah pawh chhiatrupna hrang hrang lo thelng thei puala mock drill chhenfakawm tak buatsaih zel chu sorkarin a ngaih pawimawh thu a sawi.
Mock drill hi National Disaster Management Authority (NDMA), State Disaster Management Authority (SDMA) leh District Disaster Management (DDMA)-te huaihawt a ni a; district khawpui tin bakah, hmun dang ṭhenkhatahte tuilian, leimin leh kângmei thlen thulha chhanchhuah hna thawh dan a taka entir a ni.
Mock drill hi district tinah bawrhsapte leh District Emergency Operation Centre (DEOC)-te'n an district ṭheuhah an vil a; State Emergency Operation Centre (DMR directorate) aṭangin NDMA senior Consultant Brig. Ravinder Gurung, observer pahnih - DMR secretary hlui PC Lallawmsanga leh director hlui Dominic Lalhmangaiha leh hotu dangte'n an vil bawk.
State level mock drill tihna atan Mizorama hmun 47 thlan a ni a; tuilian, kângmei, leimin vanga in chim leh lei (bridge) chim vanga chhiatna thlenga thite leh hliamte chhan chhuah dan a taka chan a ni.