ASF vanga vawk thi neitute chhawmdawl nan DC/DDMA-ah Rs 5,96,96,000 dilna a lut tawh
Vawk pùl hri, African Swine Fever (ASF) vanga vawk thite Mizoram sorkarin state disaster-ah a puang tawh a; hriat theih chinah ASF vanga vawk thi 14,924 atan chhawmdawlna dilna a lut tawh a, pawisain Rs 5,96,96,000 a tling.
Chhawmdawlna hi State Disaster Response Fund (SDRF) aṭanga pek tur niin, mahni awmna district ṭheuha district veterinary officer (DVO) hnenah dil tur a ni a; DVO-te'n ASF vanga thi ngei a ni tih an finfiah hnuah chhawmdawlna dilna chu DC/District Disaster Management Authority (DDMA) chairperson hnenah an thehlut a ni.
District 11-a DVO-te'n Vanglaini palai zawhna an chhan danin, AH&Vety department-in kumina ASF vanga vawk thi a chhinchhiah zinga vawk thi 14,924 neitu chhungkaw 4,980 tan an awmna district ṭheuha DC/DDMA-ah chhawmdawlna dilna an thehlut tawh a, chhawmdawlna an dilsak zawng zawng belhkhawm chu Rs 5,96,96,000 a tling tawh.
DVO-te chuan sorkar thuchhuak angin January 26 - November 14, 2024 inkara ASF vanga vawk thi, an hnena report leh ASF vanga thi ngei a ni tih an finfiah theihte tan chauh chhawmdawlna an dilsak thu Vanglaini an hrilh a; an hnena vawk thi hriattir lo pawh an tam thu an sawi.
ASF vanga vawk thi neitute chhawmdawl dilna hi Aizawl district-ah a tam ber a, Aizawl DVO chuan DC/DDMA-ah vawk thi 8,114 neitute chhawmdawlna tur Rs 3,24,56,000 dilna a thehlut tawh. Serchhip district-in dawtin, vawk thi 2,713 neitute chhawmdawlna atan Rs 1,08,52,000 dilna thehluh a ni.
Tarlan tawh angin, SDRF hnuaia chhawmdawlna hi ASF vanga vawk thi atan chauh pek theih a ni a, hri léng venna atana vawk suat a huam lo. Vawk suat vanga vawk chánte chhawmdawlna chu a hranpain sorkar laipuiah ṭanpuina dil a ni ṭhin.
Vawk thi neitute chhawmdawlna hi SDRF kalphung angin vawk pakhatah Rs 4,000 zel pek theih a ni. Kum 2024 chhunga ASF vanga harsatna (State Specific Disaster of ASF for 2024) bik atan erawh chuan vawk thi chu eng zat pawh ni se, chhawmdawlna hi chhungkaw pakhat tan vawk paruk chinah bak pek theih a ni lo.
AH&Vety department chhinchhiah danin, kuminah November 15 thleng khan ASF vangin Mizorama khua/veng 255-ah vawk 14,693 a thi tawh a ni.