Sorkar rate bituk aia a tlâwm loh nan ruahmanna kan siam tawh - Agri. Minister

Agricuture minister PC Vanlalruata chuan, sorkarin thlai chi li hralhna man (rate) a bituk aia hniama kut hnathawktute'n an hralh loh nan ruahmanna siam vek tawh a nih thu a sawi.

Vanglaini palai zawhna chhangin Agriculture Minister chuan, sawhthing, hmarchha, aieng leh hmunphiah man tur sorkarin a bituk aia hniama kut hnathawktute'n an hralh loh nan hma an la tih a sawi a, "Theihtawp chhuah a ni a, awareness campaign pawh district tinah neih a ni tawh. Kut hnathawktute pawh an hriat tur pawimawhte hrilh chhoh zel an ni," a ti.

PC Vanlalruata chuan, thlai hralhnaah sorkar a inrawlh kher a ngai lo mai thei tih sawiin, "Kut hnathawktute'n an thlai thar an hralhna turah hmalak a ni. Kan rate bituk aia tláwm loa an hralh ngei theih nan sorkar chuan ruahmannna a kalpui mek," a ti a; sorkar rate bituk aia toa hralhna a awm a nih chuan thlai hralhnaah sorkar a inrawlh a ṭul loh tur thu a sawi.

Kut hnathawktute'n sorkar rate aia tlawma thlai an hralh sorkarin a remtih dawn loh thu sawiin Minister chuan, "Kan rate aia tlâwm bak hralhna tur an hmu lo a nih chuan sorkar inrawlh a ṭul dawn tihna a ni a, sorkarin minimum support price a pe ang. Chumi atan chuan sorkarin pawisa a nei vek tawh," a ti.

Agriculture Minister sawi danin, sorkarin thlai a lei a ngaih thulha thlai dah khawmna tur pawh ruahman tawh a ni.