ILP lem neitu lakah FIR thehlut

Lawngtlai BDO leh election officer ni bawk Collin Hlychho chuan a signature hmanga inner line permit (ILP) siam an awm avangin November 13, Nilaini khan Lawngtlai Police Station-ah first information report (FIR) a thehlut.

ILP lem neitu Mohd Shahnawaz Ali (22), Uttar Pardesh, Ṭhuampui, Aizawla cheng mek chu Aizawl Police Station-a police-te'n November 12, 2024 khan an man a, a ILP-ah ILP siam hun laia Siaha SDC (i/c Inner Line Pass) Collin Hlychho signature a chuang a ni.

ILP hi Collin Hlychho hnenah thawn a ni a, a siam a ni lo tih a hre nghal a, a awm mekna aṭanga police station hnai ber Lawngtlai PS-ah FIR a thehlut a ni. Lawngtlai PS chuan FIR hi Aizawl PS-ah an thawn chhâwng ve leh nghal.

Mohd Shahnawaz Ali-a ILP hi a lem a nih bakah, mistiri hna thawhna tur a nih laiin a sumdawng a; ILP chu khawi aṭanga a neih nge tih police-te'n an chhui mek a ni.