KHAWTHLIR

Lunglei DC

Mizoram sorkar chuan Lunglei district commissioner atan Navneet Man, IAS a ruat thar a, R Lalṭhazuala, MCS a thlak dawn. Navneet Man hi AMGUT cadre, 2020 batch a ni a; a thlak tur R Lalṭhazuala hi Cooperative Societies registrar leh Agriculture director hna chelh kawp tura tih a ni. 

KṬP-in thisen pe

KṬP, Bethlehem North Branch chuan nimin khan an kohhran hall-ah thisen pek an huaihawt a, ZMC Blood Centre tan thisen unit 22 an pe a, petute mipa 21 leh hmeichhia pakhat an ni.

Free clinic

Child and Women Foundation leh Lungdai Hmarveng Kohhran leh YMA-te chuan nimin khan Lungdaiah a thlawna inentirna, Free Medical Clinic an buatsaih. Clinic-ah hian Aizawl aṭangin doctor pathum leh Kawnpuia CAWF TI Project doctor leh nurse-te'n hun an hmang a, mi 200 chuang an inentir. Cheng nuai 2 vel man damdawi sem a ni.

IWR Minister tel

November 14, Ningani khan Guwahati-ah Jal Shakti minister CR Patil hoin High Powered Review Board of Bhahmaputra Board meeting neih a ni a, Chief Minister aiawhin Irrigation & Water Resources minister PC Vanlalruata a tel. Ṭhutkhawmah hian Brahmaputra Board hnuaiah Mizorama anti-erosion measure kalpuina tur Tuiphai (Serchhip district), Tuipui (Champhai district) leh Chite lui (Vairengte) atana DPR pawm a ni. Tlawng lui tui hna tihpunna tur DPR tihfel a ni bawk.

Bawngkawn kawng khâr a ni dawn

NH-54 kawngpui, Bawngkawna traffic point pahnih inkar chu 'peg' khêngin, uluk taka thuah hnih (two layer)-a resurfacing hna thawh tum a ni. November 17, Pathianni hian PWD-in hna an thawh dawn avangin zing dar 7 aṭanga tlai dar 5 thleng kawngpui khâr a ni dawn a, lirthei tan kaltlang theih a ni dawn lo. Traffic SP Stephen Lalrinawma chuan lo inhmakhua a, remchang dang lo zawng turin mipui a chah.

MZI inkhawmpui

Art & Culture minister C Lalsawivunga chuan nimin khan Tourism Multipurpose Hall-ah Mizo Zaimi Insuihkhawm General Conference a hmanpui a, MZI website a tlangzarh. Minister chuan, zaimite chu Mizo hnam nunphunga bet tlat zai ngainatna chawi làr leh khawvel hriata pho chhuah tlaka tihhmasawnna tura ke penhopuiah a sáwm. MZI inkhawmpuiah hian nimin khan MJA kaihhruaiin hruaitu thar thlan a ni.