EMRS panga sakna tur lungphùm phúm; EMRS sak zawh tawh pahnih hawn a ni

Prime minister Narendra Modi chuan nimin khan Birsa Munda pian champha vawi 150-na pualin online kaltlangin India ram hmun hrang hranga Eklavya Model Residential School (EMRS) sak tur 25 lungphùm a phúm a, EMRS sak zawh thar 10 a hawng bawk. PM-in lungphùm a phùm leh a hawn zingah Mizorama EMRS sak tur panga leh sak zawh tawh pahnih a tel.

Ministry of Tribal Affairs hnuaia tribal-te tana siam EMRS sak tur lungphùmte chu Mizoramah chuan - West Phaileng, Sawleng, Khawbung, Khawzawl leh Lungsen khuaa mite a ni a; sorkar hotute'n online-in an chhim. Prime Minister hian Bilkhawthlir leh Noaohtlah khuaa EMRS sikul sak zawh tharte a hawng bawk.

EMRS, Bilkhawthlir hawnna chu Kolasib DC pisaah Assembly deputy speaker Lalfamkima leh hotu dangte'n online hmangin an chhim. Siaha district-a Noaotlah EMRS hawnna pawh additional DC Abraham Beirazi Khithie leh sorkar hotu dangte'n online-in an chhim a ni.

Bilkhawthlir leh Noaotlah khuaa EMRS-ah hian academic session 2024-25 aṭangin zirna ṭan a ni a, pawl 6-7 chauh hawn rih niin, pawl 12 thleng hawn belh tura ruahman a ni. Bilkhawthlirah hian zirlai 97 leh thawktu 16 an awm a; Noaotlah-ah thawktu 14 leh zirlai 118 an awm.

EKLAVYA MODEL RESIDENTIAL SCHOOL

▶ Constitution Article 275(1) behchhanin tribal mipui chawikanna atan EMRS duan a ni.

▶ Kum 1997-98 khan Ministry of Tribal Affairs-in India rama tribal naupangte'n zirnaa hma an sawn theih nan a din.

▶ National Education Society for Tribal Students (NESTS)-in kum 2019 aṭangin EMRS-te an enkawl.

▶ EMRS hi Mizoramah chuan Social Welfare & Tribal Affairs department hnuaiah kalpui a ni a, Mizoram EMRS Society-in an enkawl.

▶ Kum 2018-19 central budget ruahmanna angin, state leh union territory chhunga development block tina mipui 50% tribal awm tlinna hmunah emaw, tribal mipui 20,000 awm tlinna block-ah EMRS din tura tih a ni.