Hnam pasalṭhate martarna hian Zo fate min tipumkhat turin ka duh - Dr Thangtea

MNF party chuan nimin khan Manipur-a S Zezaw khaw daiah MNF dintu Laldenga lung an phun a, Rengkai, Churachanpur-ah Hmar Inpui an tlawh bawk. MNF senior vice president Dr R Lalthangliana chuan, hnam pasalṭhate martarna chuan khawvela Zo fate tipumkhat se a duh thu a sawi.

Dr R Lalthangliana chuan, "Tun ṭuma kan hnam pasalṭha mi 10-te leh Pi Zosangkimi Hmar râwng taka thah an ni khan na takin kan rilru a vit. Hnam pasalṭhate martarna hian Zo fa khawvel hmun tina awmte min phuar khawm a, min tipumkhat sauh sauh turin ka duh. Inṭhen thei kan ni lo tih kan hriat reng a ṭul a, ram chuan rî neiin, hnam chuan rî a nei ve lo," a ti a; inpumkhatna nghet tak nei turin khawvel hmun tina Zo fate a sáwm.

MNF Senior Vice President chuan, Laldenga lung an phun thei chu lawmawm a tih thu sawiin, "Pu Denga lungphun hian Zo fate inpumkhatna ṭha zawk a hrin chhuah ngei ka beisei," a ti a; Laldenga hoa MNF din chu ram leh hnam tana ding, Pathianin Zo fate a din chhuah leh a himna tura ding niin a sawi.

Lalrintluanga Sailo, MLA pawhin thu sawiin, "Manipur Chief Minister hian lo hria se ka duh chu, MNF chu kum 20 chuang kal taah khan rammu tawh kan ni. CM aṭanga báng turin ka ngen a, a báng duh lo a nih chuan Greater Mizoram hi kan demand leh ang a, he laia kan Zo fate chenna ram zawng zawng hi Mizoramah rin luh leh hi kan duh tih lo hre rawh se," a ti.

Tun hnaia Manipur-a thil thlengah ZPM sorkar a dem thu sawiin Lalrintluanga Sailo chuan, "ZPM sorkar hian aw a la nei lo hi pawi ka tiin na takin ka dem a, kan hnam martarte thisen hian inpumkhatna kawngah nasa takin awmzia nei se ka duh," a ti a; Manipur-a Zo hnahthlakte thlaphâng lo turin a chah.

Laldenga lungphun hi Ex-Mizo National Army sub-headquarters, Manipur leh S Zezaw MNF buatsaih a ni.