Thlamuang taka awm turin ráltlânte chah

Minister Lalthansanga chuan nimin khan a bial chhung, Zuangtuia Chin Relief Committee-in damlote tana inenkawl lailâwkna an buatsaihna a tlawh a; ráltlânte tan an inhawng reng tih sawiin, thlamuang taka awm turin a chah.

Lalthansanga chuan, Mizoram ṭhenawm state leh ramah tualchhung buaina neuh neuh a awm tih sawiin, "Mizote inpui - Mizoram hi kan unau raltlante tan hian a inhawng reng a, thlamuang taka an awm kan duh. Ei leh bar, silh leh fên leh chenna chungchangah pawh ni se, inthlahrung lo a, mahni in leh lo anga zalen taka in awm kan duh a ni," a ti.

Ruihhlo tawlh chungchangah inmawhpuh tawnna a awm ṭhin tih sawiin Lalthansanga chuan, "Hetiang lakah pawh fimkhur tlang turin kan inchah a ni. Zo fa hmun hrang hranga awmte insuihkhawm leh hi ZPM policy pakhat a ni a, unau, chhûl khat chhuak kan nih angin kan harsatnaah chuan tu mah tlânchhe loin, pumkhatin kan inlaichinna tichhe thei zawng zawng kan do tlan kan duh a ni," a ti bawk.

Lalthansanga hian nimin khan a bial, Aizawl East-I chhunga Zuangtuiah mipui tana dawr theih turin hun a hmang a, mimal, khawtlang hruaitu leh pawl hruaitute'n mamawhte an lo thlen. Ráltlân damlote enkawl lailawkna hmun a tlawhnaah damlote leh awmpuitute'n an harsatnate an hrilh bawk a ni.