Minister-in PM-DAJGUA IEC a hawng

Social Welfare, Tribal Affairs, Women & Child Development minister Lalrinpuii chuan nimin khan Lunglei DC conference hall-ah Prime Minister's Dharti Aaba Janatiya Gram Utkarsh Abhiyan (PM-DAJGUA) Information, Education & Communication (IEC) a hawng a, district dangahte pawh hawn a ni.

DAJGUA hi Ministry of Tribal Affairs hnuaia hnam hnuaihnung zawk leh ram leilungfa (tribal)-te dinhmun chawikanna tur leh sorkar scheme hrang hrang kaltlanga hmalaknaa a tlabal lai thawm ṭhat leh tihchangtlunna tur a ni a; IEC chu a puanzarna lama hmanlakna tur a ni.

Lalrinpuii chuan, October 2, 2024 khan India ram puma kalpui turin Prime Minister-in DAJGUA a hawng tih sawiin, "November 15-26, 2024 chhungin ram pum huapa scheme chungchanga inzirtirna mipui hnena puangzar turin IEC campaign ruahman a ni. Mizorama kalpui turah hriselna, zirna, nungcha, thing leh mau humhalh chungchang leh khawtlang leh mipui hmasawnna leh hamṭhatna lamahte insawrbing a ni dawn," a ti.

Minister Lalrinpuii chuan, "DAJGUA hi hmalakna hrang hranga a pawp lai thawmna tur leh hmasawnna tluantling leh huam kim zawk a awm theih nana ruahman a ni. Hmasawnna ruhrel thar din leh siam chhuah lam aiin, a tlabal lai thawm ṭhat chu DAJGUA-in a tum a ni," a ti a; ruahmanna hnuaia Mizorama khaw 383 thlan chhuahahte hmasawnna tluantling a thlen ngei a beisei thu a sawi.

PM-DAJGUA hmalakna tur hian India ram pumah Mission Antyodaya Survey, 2022 Critical Gap Report behchhanin tribal-te chen tamna khaw 63,000 thlan a ni a, kum 5 chhunga hmalakna atan cheng vbc 79,156 ruahman a ni.

Khaw thlan zingah hian Mizorama khaw 383 a tel a; chu'ng khuaahte chuan sorkar laipuia ministry 17-a scheme 25 hmangin hmasawnna ruhrel siam, ei leh bar, zirna, inkalpawhna, inbiakpawhna leh hriselna lamah hmasawnna hna hrang hrang thawh a ni ang.