CSR Cell-in Bengaluru-ah CSR an buaipui

Mizoram sorkara Corporate Social Responsibility Cell hotute chuan Mizoramin hmasawnna hnathawhna tur CSR fund tam zawk a hmuh theih dan tur dapin Bengaluru-ah hun an hmang a; United Nations Development Programme (UNDP) nena ṭangkawpin CSR pe ṭhinte nen inkawmna hun an buatsaih.

CSR Cell hi adviser to CM (Finance & Planning) TBC Lalvenchhunga leh Planning secretary Lalmalsawma Pachuau hoin an kal a; November 13, 2024 khan IIM, Bangalore-a NSRCEL leh NASSCOM startup hub hotute nen inkâwmin, CSR pe theite thawhpuina Mizoramin a mamawh dan an sawipui.

November 14 khan UNDP nena ṭangkawpin CSR fund pe ṭhin private sector, corporate foundation, philantrophic group leh CSO aiawh mi 40 vel nen an inkâwm a; zirna, thiamthil tihhmasawn, kutkawih eizawnna, hmeichhiate tihhmasawn, hriselna, infiamna, sik leh sa inthlak leh ṭhalaite hnathawh tur chungchangah sum tlem zawk sénga tunlai thiamna hmanga awmze nei zawka hmalak theih dan tur sawiho a ni.

CSR pe chhuak ṭhinte'n Mizoram CSR Cell hmalakna chu an ngaihlu a, Mizoram sorkarin Sustainable Development Goals tihlawhtling tura a ruahmannate an phûrpui hle niin sorkar thuchhuah chuan a tarlang.

TBC Lalvenchhunga, MLA chuan, Mizoram chu hun rei tak India ram state zinga CSR dawng tlem ber a ni tawh tih sawiin, "CSR hmang hian hmasawnna hna ṭha tak tak thawh theih a nih avangin, chief minister Pu Lalduhoma chuan private sector leh civil society organisation-te nena thawhhona tam zawk neih tumin CSR Cell a din a. A theih ang angin hma kan la a, tun kar hian UNDP nena ṭang dunin Bangalore-ah stakeholder-te nena inkawmna hun hi kan nei ta a ni. Kan hmalakna hian rah ṭha tak a chhuah ngei dawnin kan hria," a ti.