Zirnaah ṭan lak thar a ngai - Prof. Nilawma

Saitual Welfare, Aizawl chuan nimin khan Ramhlun Indoor Stadium conference hall-ah General Body Meeting an hmang a, Saitual awmna Ṭawi bialtu MLA Prof. Lalnilawma, minister of state-in hmanpuiin, zirnaah ṭan lak thar a ngaih thu a sawi.

Prof. Lalnilawma chuan, ram leh hnam humhalhna ṭha tak pakhat chu zirna a nih thu sawiin, "Zirnaah kan ṭan thar a ngai a, kan state chhung bik result leh intihsiaknaah hian duhtawk mai loin, state páwna ṭhalaite nen competition kan neih tam a ngai," a ti a; zirna lamah ngaihtuahna séng thar turin nu leh pate a chah.

Zirna leh eizawnna avangin hmun hrang hrangah awm darh a ngai ṭhin tih sawiin Lalnilawma chuan, "Chutiang hunah chuan chanchin a chhia a ṭha kan inhriat tawn zung zung nan leh mumal zawka kan inbuaipui theih nan welfare kan din ṭhin a, a ṭangkai hle. State páwnah phei chuan a pawimawh em em a, mi awm ṭha duh lote zilhhau a, khaw hmingchhiat theihna laka vengtu pawimawh tak a ni," a ti a; khaw welfare anga ṭang a, lehkhathiam thei deuhte chawi kân a ṭul thu a sawi.

Prof. Lalnilawma chuan, MLA atan thlang tlingtu Ṭawi bial mipui chungah a lawmthu a sawi a; "Kan bialah tui thianghlim hnianghnar taka kan neih theih nan hma kan la mek zel. Saitualah DTO hawn a ni tawh. Tung lamah hma kan la zel a, a sawngbawlna khawl mumal zawk kan nei theih nan chak taka hmalak mek a ni. Adventure schhol din tura hmalak mek a ni. Hmatiamin bial chhung mamawhte kan bawhzui zel dawn a ni," a ti.